tngo's, tsrtc strike, telangana govt, ravindhar reddy, rtc jac

టీఎన్జీవో నేతల ట్విస్టు…! ప్రభుత్వానికి షాక్

టీఎన్జీవో నేతలు ట్విస్టు ఇచ్చారు. ఆర్టీసీ కార్మికుల సమ్మెకు మద్దతు ఇస్తున్నట్లు ప్రకటించారు. ఆర్టీసీ నేతలు తమను సంప్రదించకుండానే సమ్మెకు వెళ్లారని.. వారికి మద్దతిచ్చేది లేదని ప్రకటించి రెండు రోజులు గడవక ముందే తమ నిర్ణయాన్ని మార్చుకున్నారు. టీఎన్జీవో నేతలు ఇటీవల ముఖ్యమంత్రి కేసీఆర్‌ను కలిసిన అంశం వివాదాస్పదమవడం, ఆర్టీసీ కార్మికుల ఆత్మహత్యల ఘటనల అనంతరం సమ్మెకు అనూహ్యంగా మద్దతు పెరగడంతో తమ స్టాండ్ మార్చుకున్నట్లు తెలుస్తోంది. నాంపల్లిలోని టీఎన్జీవో భవన్‌లో మంగళవారం (అక్టోబర్ 15) సాయంత్రం టీఎన్జీవో, టీజీవో నాయకులతో ఆర్టీసీ జేఏసీ నాయకులు సమావేశమయ్యారు. తాము చేస్తున్న సమ్మెకు మద్దతు కోరారు. అనంతరం టీఎన్జీవో అధ్యక్షుడు కారం రవీందర్ రెడ్డి, ఆర్టీసీ జేఏసీ కన్వీనర్ అశ్వత్థామరెడ్డి మీడియాతో మాట్లాడారు.

కింది స్థాయి నుంచి వచ్చిన ఒత్తిడి మేరకు ఆర్టీసీ జేఏసీకి మద్దతు ఇస్తున్నట్లు టీఎన్జీవో అధ్యక్షుడు కారం రవీందర్ రెడ్డి తెలిపారు. కార్మికుల ఆత్మహత్యలు ఎంతగానో బాధించాయని పేర్కొన్నారు. సీఎం కేసీఆర్‌ను కలవడం పట్ల అపవాదు వచ్చిందని.. చాలా బాధపడ్డామని ఆయన అన్నారు. ఉద్యోగుల సమస్యలపైనే ముఖ్యమంత్రిని కలిసినట్లు వివరణ ఇచ్చారు. ఆర్టీసీ కార్మికులకు అండగా నిలవాలని నిర్ణయించినట్లు వెల్లడించారు. బుధవారం మధ్యాహ్నం తెలంగాణ ఉద్యోగుల సమావేశం ఉంటుందని రవీందర్ రెడ్డి తెలిపారు. రాష్ట్ర ప్రభుత్వ చీఫ్ సెక్రటరీని కలిసి ఉద్యోగుల సమస్యను వివరిస్తామని చెప్పారు. ఆర్టీసీ కార్మికుల సమస్యను పరిష్కరించాలని కోరుతున్నామన్నారు. ప్రభుత్వం నుంచి సానుకూల స్పందన రాకుంటే మరో సకల జనుల సమ్మెకు సిద్ధం కావాల్సి వస్తుందని హెచ్చరించారు.

రాష్ట్ర ప్రభుత్వం తెలంగాణ ఉద్యోగులతో పాటు ఆర్టీసీ కార్మికులకు గతంలోనే 44 శాతం ఫిట్‌మెంట్ ఇచ్చిందని రవీందర్ రెడ్డి గుర్తు చేశారు. ఆర్టీసీ కార్మికులకు 16 శాతం ఐఆర్ ఇవ్వగా.. ప్రభుత్వ ఉద్యోగులకు ఇంకా ఐఆర్ ఇవ్వలేదని తెలిపారు. ఆర్టీసీ ఉద్యోగులకు తమ సహకారం ఉంటుందని టీఎన్జీవో కార్యదర్శి మమత తెలిపారు. ఉద్యోగులతో చర్చించి కార్యాచరణ ప్రకటిస్తామని.. బుధవారం నుంచి కార్మికుల సమ్మెలో పాల్గొంటామని ప్రకటించారు. ప్రభుత్వం.. ఆర్టీసీ కార్మికుల డిమాండ్లను వెంటనే పరిష్కరించాలని కోరారు.

ఇలాంటి సమయం వస్తుందనుకోలేదు..
టీఎన్జీవో, ఆర్టీసీ జేఏసీ నాయకుల భేటీ సందర్భంగా ఆసక్తికర పరిణామం చోటు చేసుకుంది. ఉద్యమ సమయం నాటి రోజులను గుర్తు చేసుకొని కొంత మంది నేతలు భావోద్వేగానికి గురయ్యారు. తెలంగాణ ఏర్పడిన తర్వాత ఇలాంటి పరిస్థితి వస్తుందని ఊహించలేదని వ్యాఖ్యానించారు. ‘ఐదేళ్ల తర్వాత ఇక్కడ సమావేశమయ్యాం.. ఇలాంటి సమయం వస్తుందని అనుకోలేదు’ అని ఉద్యోగ సంఘాల నేతలు అన్నారు. ‘తెలంగాణ రాష్ట్రం వస్తే ఊరూరికి బస్సులు తిప్పుతాం అనుకున్నాం. కానీ, ఇప్పుడు పరిస్థితి భిన్నంగా ఉంది. ప్రభుత్వం నుంచి ఆర్టీసీకి రూ.2,400 కోట్లు రావాలి. ఆర్టీసీ ఉద్యోగులకు జీతాలు తక్కువే. కార్మికులు ఎంత కష్టపడ్డా.. ఫలితం లేకుండా పోయింది. ఆర్టీసీ ఆస్తులను ప్రభుత్వం అమ్మేసింది. ఆర్టీసీని, ఆర్టీసీ ఆస్తులను, ఆర్టీసీ ఉద్యోగులను కాపాడుకోవడానికి మాత్రమే సమ్మె చేస్తున్నాం. ఉద్యోగ సంఘాలన్నీ మాకు మద్దతు ఇస్తాయని ఆశిస్తున్నాం’ అని అశ్వత్థామ రెడ్డి అన్నారు.

ప్రభుత్వంతో చర్చించడానికి సిద్ధంగా ఉన్నామని అశ్వత్థామ రెడ్డి అన్నారు. తెలంగాణ ఉద్యమంలో టీఎన్జీవోలు కీలక పాత్ర పోషించారని.. టీజీవోలకు, టీఎన్జీవోలకు రుణపడి ఉంటామని తెలిపారు. తెలంగాణ వచ్చిన తర్వాత ఆర్టీసీ తిరోగమనంలో పడిందని ఆవేదన వ్యక్తం చేశారు. ఒక్క కొత్త బస్సు కూడా కొనలేదన్నారు. 7 వేల మంది ఉద్యుగులు రిటైర్ అయితే.. కొత్తగా నియామకాలు చేపట్టలేదని తెలిపారు. రూ.1400 కోట్ల పీఎఫ్ సొమ్ము యాజమాన్యం తమ సొంతానికి వాడుకుందని ఆరోపించారు. ఉద్యోగుల మధ్య చిచ్చు పెట్టే ప్రయత్నం జరుగుతోందని అశ్వత్థామరెడ్డి మండిపడ్డారు. తప్పనిసరి పరిస్థితుల్లో సమ్మె నోటీస్ ఇవ్వాల్సి వచ్చిందని తెలిపారు. తెలంగాణ ఉద్యమంలో లేని వాళ్లు కూడా ఇవాళ తమను విమర్శిస్తున్నారని ధ్వజమెత్తారు. టీజీవోలు, టీఎన్జీవోలు స్పందించకపోవడంపై బాధతో మాట్లాడామని.. ఈ రోజు వారి మద్దతు కోరామని తెలిపారు.
Tags: tngo’s, tsrtc strike, telangana govt, ravindhar reddy, rtc jac

Leave a Reply

Your email address will not be published. Required fields are marked *