Andhra Pradesh AP Cabinet Meet Amaravati

ఏపీ రాజధానిగా అమరావతి ఉంటుందా? పోతుందా?… శాసనసభలో నేడే బిల్లు!

అమరావతి…! ఆరేళ్ల క్రితం ఉమ్మడి ఏపీ నుంచి తెలంగాణ ప్రాంతం విడిపోయిన తర్వాత, కొత్తగా ఏర్పడిన ఆంధ్రప్రదేశ్ రాష్ట్రానికి రాజధానిగా గుంటూరు, విజయవాడల మధ్య ఏర్పడిన కొత్త నగరం. ఈ నగరంలో ఇప్పటికే సచివాలయం, అసెంబ్లీ, హైకోర్టు తదితర భవనాలతో పాటు ప్రజల నివాసానికి ఎన్నో భవంతులు సిద్ధమవుతున్నాయి. కానీ ఇది నిన్నటి మాట.

పాలన వికేంద్రీకరణ పేరిట, మూడు ప్రాంతాలుగా విభజించి, ఒక్కో చోట ఒక్కో విభాగాన్ని ఏర్పాటు చేయాలని, తాజాగా అధికారంలోకి వచ్చిన వైఎస్ఆర్ కాంగ్రెస్ పార్టీ నిర్ణయించింది. ఈ నిర్ణయాన్ని అమరావతిలో భూములను స్వచ్ఛందంగా ప్రభుత్వానికి ఇచ్చిన రైతులు తీవ్రంగా ఆక్షేపిస్తూ, గడచిన నెల రోజులకు పైగా నిత్యమూ ఆందోళనలు చేస్తున్నారు. ఇక నేటి నుంచి అసెంబ్లీ సమావేశాలు ప్రారంభం కానుండటం, తొలి రోజునే రాజధాని విభజన అంశంపై క్యాబినెట్ ఓ నిర్ణయం తీసుకుని, కొత్త బిల్లును అసెంబ్లీలో ప్రవేశ పెట్టనుండటంతో ఇప్పటికే అమరావతి అష్టదిగ్బంధమైంది.

రాజధాని, ముఖ్యంగా వెలగపూడి సచివాలయం, మందడం మీదుగా దారితీసే సీడ్ యాక్సెస్ రోడ్ తదితరాలను పోలీసులు దిగ్బంధం చేశారు. అసెంబ్లీలో వైసీపీకి ఎదురు లేకపోయినా, మండలిలో నూతన బిల్లులను వ్యతిరేకించాలని విపక్ష తెలుగుదేశం పార్టీ ఇప్పటికే నిర్ణయం తీసుకుంది.

రాష్ట్ర ప్రజలు మొత్తం ఇప్పుడు శాసనసభవైపు చూస్తూ, ప్రభుత్వ వ్యూహం, అమరావతి భవిష్యత్ ఏంటన్న విషయాలపై చర్చించుకుంటున్నారు. మూడు రాజధానుల బిల్లు అసెంబ్లీలో ఆమోదం పొందితే, రైతులు ఇచ్చిన భూముల పరిస్థితి ఏంటన్న ప్రశ్న తలెత్తుతుంది. వారిలో నెలకొన్న ఆగ్రహావేశాలను చల్లార్చేందుకు ప్రభుత్వం ఎటువంటి చర్యలు చేపడుతుందన్న చర్చ కూడా జరుగుతోంది.

అయితే, తమ పార్టీ అభివృద్ధి వికేంద్రీకరణకు మద్దతిస్తుందే తప్ప, పాలన వికేంద్రీకరణకు కాదని తెలుగుదేశం పార్టీ అంటోంది. అసెంబ్లీకి వచ్చే ఎమ్మెల్యేలు, ఎమ్మెల్సీలు మినహా, మిగతా తెలుగుదేశం పార్టీ ముఖ్య నేతలందరినీ పోలీసులు ఇప్పటికే హౌస్ అరెస్ట్ చేశారు. ప్రకాశం బ్యారేజ్ పై వాహనాల రాకపోకలను నియంత్రించారు. న్యాయమూర్తులు, న్యాయవాదులు, సచివాలయ ఉద్యోగులు, ఎమ్మెల్యేలు, ఎమ్మెల్సీలు మినహా మరెవరినీ బ్యారేజ్ పైకి అనుమతించడం లేదు.

ఇదిలావుండగా, ప్రభుత్వం ప్రవేశపెట్టే బిల్లులను అధ్యయనం చేసేందుకు తమకు కనీసం వారం రోజుల సమయం కావాలని అసెంబ్లీలో డిమాండ్ చేయాలని తెలుగుదేశం పార్టీ అధినేత చంద్రబాబునాయుడు భావిస్తున్నారు. ఇదే సమయంలో అధికార వైసీపీ సైతం వ్యూహాత్మకంగా అడుగులు వేస్తోంది. ఇప్పటికే రాజధానిపై ఆ పార్టీ స్పష్టమైన నిర్ణయానికి వచ్చినట్టు తెలుస్తోంది.

విశాఖపట్నంలో కార్యనిర్వహణ, అమరావతిలో శాసన, కర్నూలులో న్యాయ రాజధానులను ఏర్పాటు చేయాలని నిర్ణయం తీసేసుకున్నట్టు సమాచారం. రాష్ట్ర అభివృద్ధి, రాజధాని అంశాలపై రెండు కమిటీలు నివేదికలు ఇవ్వగా, అవి ప్రభుత్వానికి అనుకూలంగానే ఉన్నాయి. వీటిని తెలుగుదేశం, బీజేపీ, జనసేన, కాంగ్రెస్, సీపీఐ వ్యతిరేకిస్తుండగా, ప్రభుత్వం ఓ హై పవర్ కమిటీని వేసిన సంగతి తెలిసిందే.

హై పవర్ కమిటీ కూడా తన నివేదికను ప్రభుత్వానికి అందించింది. ఈ కమిటీ రిపోర్టు కూడా ప్రభుత్వానికి అనుకూలంగానే ఉంది. దీనిపై ఈ ఉదయం, వైఎస్ జగన్ నేతృత్వంలో సమావేశం కానున్న రాష్ట్ర క్యాబినెట్ కీలక నిర్ణయం తీసుకోనుంది. ఆపై హై పవర్ కమిటీ నివేదిక అసెంబ్లీకి రానుండగా, అమరావతి భవితవ్యం మరో రెండు రోజుల్లో తేలనుంది.
Tags: Amaravati Assembly,Jagan YSRCP,Chandrababu

Nalgonda District,Chanduru Lakkireddy,Gudem Telangana,Municipal Elections

ఓట్ల కోసం అభ్యర్థి మాస్టర్ ప్లాన్… నల్గొండ జిల్లాలో ఊరంతా ఖాళీ!

అది నల్గొండ జిల్లా చండూరు మండలం లకినేని గూడెం. ఇక్కడి మూడో వార్డు పరిధిలో దాదాపు 800 మందికి పైగా నివాసం ఉంటుండగా, సుమారు 520 ఓట్లు ఉన్నాయి. ఇక తెలంగాణలో స్థానిక ఎన్నికలు జరుగుతున్న వేళ, ఆయా పార్టీలు ఓట్ల కోసం అందరినీ గ్రామం నుంచి తరలించడంతో ఇప్పుడా గ్రామం బోసిపోయింది.

ఓటర్లను సమీపంలోని కోళ్లఫామ్ లకు తరలించిన అభ్యర్థులు, వారికి అవసరమైన సమస్త సౌకర్యాలనూ కల్పిస్తున్నారు. నిన్న ఉదయం ఓటర్లను తరలించిన అభ్యర్థులు, అల్పాహారం, మధ్యాహ్న భోజనం, రాత్రి విందు, ఆపై మద్యం తదితరాలను సరఫరా చేసినట్టు సమాచారం. ఇక మందు కొట్టిన తరువాత ఎవరైనా వివాదాలకు దిగుతారని భావించిన అభ్యర్థులు, వారిని గ్రూపులుగా విడదీసి, దూరంగా ఉండే ఇతర షెడ్లలో విశ్రాంతి ఏర్పాట్లను చేశారట. కాగా, తెలంగాణలో మునిసిపల్ ఎన్నికల ప్రచారానికి నేటితో తెరపడనుండగా, రెండు రోజుల్లో పోలింగ్ జరుగనున్న సంగతి తెలిసిందే.
Tags: Nalgonda District,Chanduru Lakkireddy,Gudem Telangana,Municipal Elections

Andhra Pradesh AP Cabinet Meet Amaravati

ఏపీ కేబినెట్ మీటింగ్‌ నే

డు కాదు.. సోమవారమే!
ఆంధ్రప్రదేశ్ కేబినెట్ మీటింగ్ విషయంలో గందరగోళం నెలకొంది. సమావేశాన్ని తొలుత ఈ నెల 20న నిర్వహించనున్నట్టు మూడు రోజుల క్రితమే మంత్రులకు సమాచారం అందింది. అయితే, శుక్రవారం మధ్యాహ్నానికి తన నిర్ణయాన్ని మార్చుకున్న ప్రభుత్వం శనివారం మధ్యాహ్నం మూడు గంటలకు మీటింగ్ ఉంటుందని మంత్రులకు తెలియజేసింది. అయితే, రాత్రి కల్లా మళ్లీ ఈ నిర్ణయం మారిపోయింది. ముందుగా అనుకున్న ప్రకారమే సోమవారం ఉదయం 9 గంటలకే మీటింగ్ ఉంటుందని మళ్లీ మంత్రులకు సమాచారం అందించింది.

రాజధాని మార్పుకు సంబంధించి అసెంబ్లీలో బిల్లు ప్రవేశపెట్టడానికి ముందు గవర్నర్ అనుమతి తీసుకోవాల్సి ఉంటుంది. ఉదయం 9 గంటలకు మంత్రి మండలి ఆమోదిస్తే, దానిని గవర్నర్‌కు పంపి అనుమతి తీసుకుని రెండు గంటల్లోపే అసెంబ్లీ సమావేశాలకు తీసుకురావడంలో హడావుడి ఏర్పడుతుందని ప్రభుత్వం భావించింది. అందుకనే తొలుత శనివారమే కేబినెట్ మీటింగ్ పెట్టాలని నిర్ణయించారు.

అయితే, బిల్లుపై పూర్తిస్థాయిలో చర్చించి, మంత్రి మండలిలో ప్రవేశపెట్టడానికి కొంత సమయం తీసుకోవాలని తాజాగా నిర్ణయించినట్టు తెలుస్తోంది. కాబట్టి ఈ విషయంలో నిదానంగానే వ్యవహరించాలని ప్రభుత్వం భావించి మీటింగ్‌ను ముందుగా అనుకున్నట్టే సోమవారం ఉదయం 9 గంటలకు నిర్వహించాలని నిర్ణయించి, ఆ మేరకు మంత్రులకు సమాచారం పంపారు.
Tags: Andhra Pradesh AP Cabinet Meet Amaravati

Nagababu Janasena Andhra Pradesh ys jgan mohan reddy

డియర్ జగన్ రెడ్డి గారూ ఇది నా అభ్యర్థన: నాగబాబు

‘డియర్ జగన్ రెడ్డి గారూ ఇది నా అభ్యర్థన’ అంటూ జనసేన నేత నాగబాబు ట్వీట్లు చేశారు. ‘దయచేసి మీ తప్పులను సరిదిద్దుకుని, మిగిలిన నాలుగున్నరేళ్లు రాష్ట్రాన్ని పరిపాలించండి. మీకు అసెంబ్లీలో 151 మంది ఎమ్మెల్యేల బలం ఉంది. రాష్ట్రంలో సుపరిపాలన అందించాలని మీరు అనుకుంటే రాష్ట్ర ప్రజలతో గొడవ పెట్టుకోకండి, గందరగోళానికి గురవ్వకండి’ అని పేర్కొన్నారు.

‘మీ తప్పులను సరిదిద్దుకోవడానికి మీకు ఇప్పటికీ సమయం ఉంది. మీరు తప్పులు చేయాలని మేము కోరుకోము. మీరు చేసే తప్పుల ఆధారంగా రాజకీయ ప్రయోజనాలు పొందాలని మేము అనుకోము. ఇటువంటి ఆలోచనలు జనసేన పార్టీకి లేవు. మీ ఎమ్మెల్యేలను నియంత్రణలో పెట్టుకోండి.. మీ విక్టరీని వారు నాశనం చేస్తారు. మీ నిర్ణయాలను విమర్శించే అవకాశాన్ని మాకు ఇవ్వకండి. రాష్ట్ర ప్రజలందరినీ ఒకేలా చూస్తూ వారిని ప్రేమించండి.. మీ తండ్రి వైఎస్ రాజశేఖర్ రెడ్డి గారిలా చేయడానికి కనీసం ప్రయత్నమైనా చేయండి’ అని నాగబాబు చెప్పారు.
Tags: Nagababu Janasena Andhra Pradesh ys jgan mohan reddy

MIM Asaduddin Owaisi TRS BJP Congress

మజ్లిస్ ప్రధాన ప్రత్యర్థి టీఆర్ఎస్సే: అసదుద్దీన్ ఒవైసీ

తెలంగాణలో త్వరలో జరగనున్న మునిసిపల్ ఎన్నికల్లో తాము ఒంటరిగా బరిలోకి దిగడం వెనకున్న కారణాన్ని మజ్లిస్ చీఫ్ అసదుద్దీన్ ఒవైసీ వెల్లడించారు. ఓ ప్రముఖ పత్రికకు ఇచ్చిన ఇంటర్వ్యూలో ఆయన మాట్లాడుతూ.. టీఆర్ఎస్‌తో తమ స్నేహం కొనసాగుతుందని, అయితే, పట్టణ ప్రాంతాల్లో ఏ పార్టీకి ఎంత పట్టు ఉందో తెలుసుకునేందుకే ఒంటరిగా పోటీ చేస్తున్నట్టు తెలిపారు. మజ్లిస్ ఏ ఒక్క ప్రాంతానికో పరిమితమైన పార్టీ కాదని, అది జాతీయ పార్టీ అని పేర్కొన్నారు. తమ పార్టీ ఎమ్మెల్యేలు మహారాష్ట్రలో ఇద్దరు ఉన్నారని, అదే రాష్ట్రం నుంచి ఓ ఎంపీ కూడా ఉన్నారని గుర్తు చేశారు. బీహార్‌ అసెంబ్లీలోనూ తమ పార్టీకి ప్రాతినిధ్యం ఉందన్నారు.

గత మునిసిపల్ ఎన్నికల్లో భైంసా మునిసిపల్ చైర్మన్‌, వైస్‌ చైర్మన్‌ పదవులను చేపట్టినట్టు అసదుద్దీన్ వివరించారు. వికారాబాద్‌, నిజామాబాద్‌, కోరుట్లలో వైస్‌ చైర్మన్‌ పదవులకు మజ్లిస్‌ ఎన్నికైందన్నారు. ఈసారి వాటితో పాటు మరిన్ని వార్డులు, డివిజన్లలో విజయం సాధిస్తామని ఒవైసీ ధీమా వ్యక్తం చేశారు.

టీఆర్ఎస్ పాలనలో రాష్ట్రంలో శాంతిభద్రతల సమస్యలు లేవని, మైనారిటీలు సంతోషంగా ఉన్నారన్న ఆయన.. ఆ పార్టీతో స్నేహపూర్వకంగా ఉంటున్నా, మునిసిపల్ ఎన్నికల్లో ఆ టీఆర్ఎస్‌తో కలిసి పనిచేయాల్సిన అవసరం లేదన్నారు. రాష్ట్రంలో తమ బలం తమకు ఉందన్నారు. ఇక రాష్ట్రంలో కాంగ్రెస్ ఖాళీ అయిందని, బీజేపీకి తెలంగాణలో స్థానం లేదని, కాబట్టి మునిసిపల్ ఎన్నికల్లో టీఆర్ఎస్సే చాలా చోట్ల తమకు ప్రధాన ప్రత్యర్థి అని అసదుద్దీన్ ఒవైసీ పేర్కొన్నారు.
Tags: MIM Asaduddin Owaisi TRS BJP Congress

Dk Shivakumar Congress Karnataka

కేపీసీసీ అధ్యక్షుడిగా డీకే శివకుమార్ పేరు ఖరారు..

కర్ణాటక కాంగ్రెస్‌లో ముసలం మొదలైంది. డీకే శివకుమార్‌కు కేపీసీసీ అధ్యక్ష బాధ్యతలు దాదాపు ఖాయమని తేలడంతో సిద్ధరామయ్య వర్గంలో అసంతృప్తి మొదలైంది. మరోవైపు, శివకుమార్‌ను పీసీసీ చీఫ్‌గా ఏ క్షణమైనా అధిష్ఠానం ప్రకటించే అవకాశం ఉందని తెలుస్తోంది. గత లోక్‌సభ ఎన్నికల్లో కాంగ్రెస్ ఒకే ఎంపీ స్థానంలో సరిపెట్టుకుంది. దీంతో పీసీసీ చీఫ్ గుండూరావును మార్చి కొత్త అధ్యక్షుడిని నియమించాలని నిర్ణయించారు. అయితే, అప్పటికే సంకీర్ణ ప్రభుత్వం అధికారంలో ఉండడంతో ఆ నిర్ణయాన్ని వాయిదా వేశారు. ఇటీవల జరిగిన ఉప ఎన్నికల్లో కాంగ్రెస్ ఘోర వైఫల్యాన్ని మూటగట్టుకోవడంలో గుండూరావు తన పదవికి రాజీనామా చేశారు. దీంతో నూతన అధ్యక్షుడి ఎన్నిక తప్పనిసరి అయింది.

మూడు రోజుల క్రితం ఢిల్లీ వెళ్లిన సిద్ధరామయ్య..సోనియాను కలిసి అధ్యక్ష పదవికి ఎంబీ పాటిల్ సరైన వ్యక్తని సూచించారు. అయితే, రాహుల్ గాంధీ మాత్రం డీకేవైపే మొగ్గు చూపుతున్నట్టు సమాచారం. మరోవైపు, సంకీర్ణ ప్రభుత్వం కూలడానికి సిద్ధరామయ్య కూడా కారణమని భావిస్తున్న సోనియా.. ఆయన ప్రతిపాదనను పక్కనపెట్టినట్టు తెలుస్తోంది.

రాష్ట్రంలో పార్టీని బలోపేతం చేసేందుకు వ్యూహాలు రచిస్తున్న కాంగ్రెస్ అధిష్ఠానం అందులో భాగంగా శివకుమార్‌కే అధ్యక్ష బాధ్యతలు అప్పజెప్పాలని దాదాపు ఓ నిర్ణయానికి వచ్చినట్టు తెలుస్తోంది. అదే జరిగితే సిద్ధరామయ్యకు పార్టీలో ప్రాధాన్యం తగ్గినట్టే అవుతుందని ఆయన వర్గీయులు అంటున్నారు. పరమేశ్వర్ సహా పలువురు సీనియర్‌లు కూడా సిద్ధరామయ్యను వ్యతిరేకిస్తున్నారు. వారందరూ కూడా డీకేకే మద్దతు తెలిపే అవకాశం ఉంది.
Tags: Dk Shivakumar Congress Karnataka

Jagan,Amaravati, Andhra Pradesh

ఏపీ సీఎం జగన్‌ నివాసంలో ‘రాజధాని’ హైపవర్ కమిటీ కీలక భేటీ

అమరావతి రాజధాని అంశంపై వచ్చిన నివేదికలను పరిశీలించి నిర్ణయం తీసుకునేందుకు ఏపీ ప్రభుత్వం ఏర్పాటుచేసిన హైపవర్ కమిటీ ఈ రోజు కీలక భేటీలో పాల్గొంటోంది. గుంటూరు జిల్లా తాడేపల్లిలోని ముఖ్యమంత్రి జగన్ నివాసంలో ఆ కమిటీ సభ్యులు సమావేశమయ్యారు. సీఎంతో కీలక అంశాలపై చర్చలు జరుపుతున్నారు.

ఇటీవల రాజధాని విషయంపై జీఎన్‌ రావు, బీసీజీ కమిటీలు ఇచ్చిన నివేదికలపై హైపవర్ కమిటీ అధ్యయనం చేసింది. రాజధానిపై వచ్చిన పలు ప్రతిపాదనలపై సీఎంకు హైపవర్ కమిటీ ప్రజెంటేషన్‌ ఇస్తోంది. రైతులు ఏమైనా చెప్పదల్చుకుంటే వారి నుంచి సలహాలు, సూచనలు తీసుకోవాలని ఇటీవల కమిటీ నిర్ణయం తీసుకుంది.
Tags: Jagan,Amaravati, Andhra Pradesh

Jupally Krishna,TRS Kolhapur,Municipal Elections

టీఆర్ఎస్ కు జూపల్లి కృష్ణారావు షాక్

మున్సిపల్ ఎన్నికలు టీఆర్ఎస్ పార్టీకి తలనొప్పిగా మారాయి. టికెట్లు లభించని నేతలు పలుచోట్ల రెబెల్ అభ్యర్థులుగా బరిలోకి దిగుతున్నారు. ఈ పరిణామాలు టీఆర్ఎస్ శ్రేణుల్లో గుబులు రేపుతున్నాయి. మరోవైపు, రెబెల్స్ తరపున టీఆర్ఎస్ కీలక నేత, మాజీ మంత్రి జూపల్లి కృష్ణారావు ప్రచార పర్వంలోకి దిగడం సంచలనంగా మారింది. కొల్లాపూర్ మున్సిపాలిటీలో పార్టీ తరపున ఎమ్మెల్యే హర్షవర్ధన్ రెడ్డి వర్గీయులు బీఫామ్ తో పోటీ చేస్తున్నారు. తన వర్గీయులకు ప్రాధాన్యత లభించకపోవడంతో జూపల్లి ఆగ్రహానికి గురయ్యారు. దీంతో, దాదాపు 20 వార్టుల్లో తన వర్గీయులను ఫార్వర్డ్ బ్లాక్ నుంచి బరిలోకి దింపారు. అంతేకాదు, వారి తరపున ప్రచారాన్ని కూడా చేపట్టారు. దీంతో, కొల్లాపూర్ రాజకీయం రసవత్తరంగా మారింది.

మరోవైపు జూపల్లి అంశం టీఆర్ఎస్ అధిష్ఠానం దృష్టికి వెళ్లింది. మున్సిపల్ ఎన్నికల బాధ్యతలను తన భుజాలపై వేసుకున్న పార్టీ వర్కింగ్ ప్రెసిడెంట్ కేటీఆర్ ఈ అంశంపై ఆరా తీసినట్టు సమాచారం. అందరూ కలసికట్టుగా పార్టీ విజయం కోసం కృషి చేయాలని కేటీఆర్ ఆదేశించినట్టు తెలుస్తోంది. అంతేకాదు, ఎమ్మెల్సీ పల్లా రాజేశ్వర్ రెడ్డిని కొల్లపూర్ కు పంపుతున్నట్టు సమాచారం.
Tags: Jupally Krishna,TRS Kolhapur,Municipal Elections

Janasena,BJP,Andhra Pradesh

కన్నా లక్ష్మీనారాయణతో జనసేన నేతల భేటీ

బీజేపీ ఆంధ్రప్రదేశ్ అధ్యక్షుడు కన్నా లక్ష్మీ నారాయణ నివాసంలో ఆయనను ఈ రోజు ఉదయం పలువురు జనసేన నేతలు మర్యాదపూర్వకంగా కలిశారు. జనసేన పొలిటికల్ ఎఫైర్స్ కమిటీ సభ్యుడు బోనబోయిన శ్రీనివాస్ యాదవ్ నేతృత్వంలో లక్ష్మీనారాయణతో జనసేన నేతలు చర్చించారు. ఆయనతో భేటీ ముగిసిన అనంతరం శ్రీనివాస్ యాదవ్ మీడియాతో మాట్లాడుతూ… ఇరు పార్టీల మధ్య పొత్తు ఏర్పడడం శుభ పరిణామంగా భావిస్తున్నామని తెలిపారు.

ఏపీ ప్రజల అభిప్రాయాలకు అనుగుణంగానే వైసీపీ పరిపాలన సాగించాలని శ్రీనివాస్ యాదవ్ అన్నారు. లేదంటే సర్కారుపై తాము ఒత్తిడి తెస్తామని, రానున్న రోజుల్లో బీజేపీతో కలిసి సమస్యలపై పోరాడతామని చెప్పారు. టీడీపీ, వైసీపీలకు సమాన దూరంలో ఉండి ప్రజా సమస్యలపై పోరాడుతామని ఆయన తెలిపారు. ఆంధ్రప్రదేశ్ సంస్థల ఎన్నికల్లో తాము సత్తా చాటుతామన్నారు.
Tags: Janasena,BJP,Andhra Pradesh

Pawan Kalyan, Jana Sena, BJP GVL, Kanna Lakshminarayana

పొత్తా? విలీనమా?… జనసేన, బీజేపీ కీలక సమావేశం మొదలు!

భారతీయ జనతా పార్టీ ఆంధ్రప్రదేశ్ నేతలతో, జనసేన నేతల కీలక సమావేశం విజయవాడలో ప్రారంభమైంది. ఈ వారం ప్రారంభంలో రెండు రోజుల పాటు హస్తినలో మకాం వేసిన జనసేన అధ్యక్షుడు పవన్ కల్యాణ్, బీజేపీ జాతీయ అధ్యక్షుడు జేపీ నడ్డాతో సమావేశమైన సంగతి తెలిసిందే. జనసేనను తమ పార్టీలో విలీనం చేయాలని, బీజేపీ రాష్ట్ర అధ్యక్ష బాధ్యతలను స్వీకరించి, పార్టీని అధికారానికి దగ్గరగా తీసుకుని వెళ్లాలని నడ్డా కోరినట్టు వార్తలు వచ్చాయి. దీనిపై అప్పటికప్పుడు ఎటువంటి సమాధానాన్నీ చెప్పని పవన్ కల్యాణ్, 2024లో వచ్చే ఎన్నికల వరకూ కలిసి పని చేద్దామని కోరారన్న సంగతి తెలిసిందే. ఈ నేపథ్యంలో రాష్ట్రంలో ఇరు పార్టీల భవిష్యత్ వ్యూహాలపై చర్చించేందుకు విజయవాడ వేదికైంది. జనసేన తరఫున పవన్ కల్యాణ్, నాదెండ్ల మనోహర్, బీజేపీ తరఫున కన్నా లక్ష్మీ నారాయణ, జీవీఎల్, సునీల్ దేవధర్ హాజరు కానున్నారు.

స్థానిక ఎన్నికల్లో పొత్తు, రాజధాని అంశం, ప్రజా సమస్యలపై ఉమ్మడి ప్రణాళిక తదితర అంశాలపై ఇరు పార్టీల మధ్యా చర్చలు జరగనున్నాయని తెలుస్తుండగా, బీజేపీలో జనసేన పార్టీని విలీనం చేయడం, అందుకు విధివిధానాలపై నేతలు మాట్లాడుకోనున్నారని జనసేనలోని ఓ వర్గం చెబుతోంది. నిన్న జీవీఎల్ మాట్లాడుతూ, స్థానిక ఎన్నికలు, అమరావతి అంశం మాత్రమే తమ అజెండా కాదని వ్యాఖ్యానించడం విలీనం ఊహాగానాలను మరింతగా పెంచింది. మొత్తానికి నేడు జరగనున్న జనసేన, బీజేపీ సమావేశం రాష్ట్ర రాజకీయాల్లో కీలక పరిణామమని రాజకీయ విశ్లేషకులు అంచనా వేస్తున్నారు.
Tags: Pawan Kalyan, Jana Sena, BJP GVL, Kanna Lakshminarayana