India Bulbul Cyclone

తెలుగు రాష్ట్రాలపై కనిపిస్తున్న ‘బుల్ బుల్’ ప్రభావం!

  • తీవ్ర తుఫానుగా మారిన బుల్ బుల్
  • పూర్తిగా మేఘావృతమైన ఆకాశం
  • శనివారం సాయంత్రం తరువాత తీరం దాటే అవకాశం

బంగాళాఖాతంలో పెను తుఫానుగా మారిన ‘బుల్ బుల్’ ప్రభావం తెలుగు రాష్ట్రాలపై కనిపిస్తోంది. ఈ తుఫాను పశ్చిమ బెంగాల్, బంగ్లాదేశ్ వైపు పయనిస్తున్నప్పటికీ, ఒడిశా, ఏపీ, తెలంగాణ రాష్ట్రాల్లోని కొన్ని ప్రాంతాల్లో వర్షాలు కురుస్తున్నాయి. ముఖ్యంగా ఆకాశం పూర్తిగా మేఘావృతమైంది. ఉదయం 8 గంటల సమయంలోనూ సూర్యుడు కనిపించని పరిస్థితి.

ప్రస్తుతం బుల్ బుల్ అండమాన్ కు సమీపంలోనే ఉందని, దీని ప్రభావంతో ఇప్పటికే తీర ప్రాంత రాష్ట్రాల్లో ఓ మోస్తరు నుంచి భారీ వర్షాలు కురుస్తున్నాయని, దీని ప్రభావం మరో 72 గంటల వరకూ ఉంటుందని వాతావరణ శాఖ అధికారులు వెల్లడించారు. సముద్రం అల్లకల్లోలంగా ఉంటుందని, బెంగాల్ తీరంలో గంటకు 100 కిలోమీటర్ల వరకూ వేగంతో గాలులు వీస్తున్నాయని తెలిపారు.

ఆంధ్రప్రదేశ్ లోని ఉత్తరాంధ్ర ప్రాంతంలో బుల్ బుల్ ప్రభావం అధికంగా ఉందని విశాఖపట్నం వాతావరణ హెచ్చరికల కేంద్రం పేర్కొంది. శనివారం సాయంత్రం తరువాత పశ్చిమ బెంగాల్ ప్రాంతంలో ఇది తీరాన్ని దాటవచ్చని అంచనా వేస్తున్నట్టు వెల్లడించింది. తుఫాను తన దిశను మార్చుకునే అవకాశాలు కూడా ఉన్నాయని, ఇది ఒడిశా వైపు పయనిస్తే, చాలా ప్రాంతాల్లో కుంభవృష్టి కురుస్తుందని హెచ్చరించింది.
Tags: India Bulbul Cyclone, Andhra Pradesh, Telangana, West Bengal, Bangladesh

closed deadline, tsrtc strike deadline, kcr transport minister meeting

ముగిసిన డెడ్ లైన్.. ఆర్టీసీ ఉన్నతాధికారులతో కేసీఆర్ భేటీ

  • విధుల్లో చేరేందుకు విధించిన డెడ్ లైన్ ను పట్టించుకోని ఆర్టీసీ ఉద్యోగులు
  • రవాణాశాఖ మంత్రి, ఉన్నతాధికారులతో కేసీఆర్ సమీక్ష
  • కీలక నిర్ణయం తీసుకునే అవకాశం

తిరిగి ఉద్యోగాల్లో చేరేందుకు ఆర్టీసీ ఉద్యోగులకు ముఖ్యమంత్రి కేసీఆర్ విధించిన గడువు నిన్న అర్ధరాత్రితో ముగిసింది. ప్రభుత్వ డెడ్ లైన్ ను ఆర్టీసీ ఉద్యోగులు పట్టించుకోలేదు. రాష్ట్ర వ్యాప్తంగా కేవలం 373 కార్మికులు మాత్రమే విధుల్లో చేరినట్టు సమాచారం.

ఈ నేపథ్యంలో, ఆర్టీసీ సమ్మెపై ప్రగతి భవన్ లో రావాణాశాఖ మంత్రి పువ్వాడ అజయ్, ఆర్టీసీ, రవాణాశాఖ ఉన్నతాధికారులతో కేసీఆర్ సమావేశమయ్యారు. సమ్మె నేపథ్యంలో ప్రత్యామ్నాయ ఏర్పాట్లు, హైకోర్టు ముందు ఉంచాల్సిన అంశాలపై సమీక్ష నిర్వహిస్తున్నారు. ప్రజలకు ఇబ్బంది తలెత్తకుండా తీసుకోవాల్సిన చర్యలపై చర్చిస్తున్నారు. ఈ సమావేశంలో కీలక నిర్ణయం తీసుకునే అవకాశం ఉన్నట్టు తెలుస్తోంది.
Tags: closed deadline, tsrtc strike deadline, kcr transport minister meeting

CPI Narayana, KCR TRSRTC Strike, Telangana, slams

తలకిందులుగా తపస్సు చేసినా కేసీఆర్ ఆ పని చేయలేరు: సీపీఐ నారాయణ

  • ఆర్టీసీని కేసీఆర్ ప్రైవేటు పరం చేయలేరు
  • కేసీఆర్ ధోరణి వల్లే కార్మికులు సమ్మె బాట పట్టారు
  • కార్మికుల డిమాండ్లు న్యాయ సమ్మతమైనవి

ముఖ్యమంత్రి కేసీఆర్ అహంకారపూరిత ధోరణి, ఆయన చేసిన తప్పిదం వల్లే ఆర్టీసీ కార్మికులు సమ్మెబాట పట్టారని సీపీఐ నేత నారాయణ అన్నారు. ఆర్టీసీ కార్మికుల డిమాండ్లు న్యాయ సమ్మతమైనవని చెప్పారు. సమ్మె నోటీసు ఇచ్చిన తర్వాత వారితో కేసీఆర్ చర్చలు ఎందుకు జరపలేదని ప్రశ్నించారు.

కార్మికుల సమ్మె విషయంలో కేసీఆర్ పై కేసు నమోదు చేయాలని డిమాండ్ చేశారు. కేసీఆర్ తలకిందులుగా తపస్సు చేసినా… ఆర్టీసీని ప్రైవేటు పరం చేయలేరని వ్యాఖ్యానించారు. తక్షణమే ఆర్టీసీ కార్మికులతో చర్చలు జరపాలని డిమాండ్ చేశారు.
Tags: CPI Narayana, KCR TRSRTC Strike, Telangana, slams

Telangana, KCR, Vijashanthi, Congress

ఆర్థిక కష్టాల్లో ఉన్న ఆర్థికశాఖనూ ప్రైవేటు పరం చేయండి: విజయశాంతి

కేసీఆర్ నిర్ణయం దొరల నిరంకుశత్వానికి నిదర్శనం
మీకు వర్తించని సూత్రాలు ఆర్టీసీకి ఎలా వర్తిస్తాయి?
అప్పుల్లో తెలంగాణ రాష్ట్రం
ఆర్టీసీని ప్రైవేటు పరం చేయడం తప్పదని పదేపదే చెబుతున్న తెలంగాణ ముఖ్యమంత్రి కేసీఆర్‌కు తెలంగాణ కాంగ్రెస్ ప్రచార కమిటీ చైర్‌పర్సన్ విజయశాంతి ఘాటు కౌంటర్ ఇచ్చారు. నష్టాల్లో ఉన్నందుకు ఆర్టీసీని ప్రైవేటుపరం చేసేటట్టు అయితే, ఆర్థిక కష్టాల్లో ఉన్న ఆర్థిక శాఖను కూడా ప్రైవేటు పరం చేయాలని సూచించారు. తెలంగాణ ప్రజలందరూ ఇదే మాట అనుకుంటున్నారని అన్నారు.

మీకు వర్తించని ఆర్థిక సూత్రాలు ఆర్టీసీకి మాత్రమే వర్తించాలని అనుకోవడం దొరల నిరంకుశత్వానికి నిదర్శనమన్నారు. ఆర్టీసీని ప్రైవేటీకరణ చేయాలని కేసీఆర్ నిర్ణయం తీసేసుకున్నారని, తన కుట్రను కప్పిపుచ్చుకునేందుకు కొత్త నాటకం మొదలుపెట్టారని విజయశాంతి మండిపడ్డారు.

కేసీఆర్ చెబుతున్న ఆర్థిక క్రమశిక్షణ తెలంగాణ ప్రభుత్వానికి కూడా వర్తిస్తుందన్న విజయశాంతి.. టీఆర్ఎస్ ప్రభుత్వం తీసుకున్న అనాలోచిత నిర్ణయాల వల్ల ఆర్థిక పరిస్థితి అస్తవ్యస్తంగా మారిందని ఆరోపించారు. మిగులు బడ్జెట్‌తో మొదలైన తెలంగాణ రాష్ట్రం ఇప్పుడు నిండా అప్పుల్లో మునిగిందని ఆమె ఆవేదన వ్యక్తం చేశారు.
Tags: Telangana, KCR, Vijashanthi, Congress

ESI Scam నిందితురాలు దేవికారాణి లీలలు

  • ఈఎస్ఐ స్కాంలో శ్రీనివాసరెడ్డి అరెస్ట్
  • విచ్చలవిడిగా వచ్చి పడుతున్న డబ్బుతో జల్సాలు
  • కోట్లకు పడగలెత్తిన సాధారణ ఫార్మసిస్ట్ నాగలక్ష్మి

ఈఎస్ఐ ఇన్సూరెన్స్‌ మెడికల్‌ సర్వీసెస్‌ (ఐఎంఎస్‌) మాజీ డైరెక్టర్‌ దేవికారాణి కేసులో విస్తుపోయే విషయాలు బయటకు వస్తున్నాయి. అక్రమంగా సంపాదించిన సొమ్ముతో ఆమె విలాసవంతమైన జీవితం గడిపినట్టు ఏసీబీ అధికారులు గుర్తించారు. విలాసాల కోసం ఆమె వెచ్చించిన సొమ్ము, అక్రమాస్తులు ఎలా సంపాదించిందీ ఆరాతీస్తున్నారు. అంతేకాదు, సాధారణ ఫార్మసిస్టు అయిన కొడాలి నాగలక్ష్మి కూడా కోట్లకు పడగలెత్తడం అధికారులను ఆశ్చర్యపరుస్తోంది. ఈ కేసులో ఏసీబీ అధికారులు నిన్న తేజ ఫార్మా ఎండీ సోదరుడు శ్రీనివాసరెడ్డిని అరెస్ట్ చేశారు.

కాగా, అక్రమంగా కోట్లాది రూపాయలు సంపాదించిన నిందితులు దేవికారాణి, నాగలక్ష్మి, రాజేశ్వర్‌రెడ్డి, శ్రీనివాసరెడ్డిలు విలాసాల కోసం డబ్బును విచ్చలవిడిగా ఖర్చు చేసినట్టు అధికారులు గుర్తించారు. విచ్చలవిడిగా డబ్బు వచ్చిపడుతుంటే ఏం చేయాలో తోచక జల్సాలకు అలవాటు పడ్డారు. ఖరీదైన హోటళ్లలో బర్త్‌డే పార్టీలు, విందులు, వినోదాలు, పబ్‌లలో ఎంజాయ్ చేసినట్టు అధికారుల విచారణలో తేలింది.

అంతేకాదు, పార్టీలలో దేవికారాణి ప్రత్యేకంగా కనిపించేందుకు ఉబలాటపడేవారు. బ్యూటీషియన్లను పిలిపించుకుని అందంగా తయారయ్యేవారు. డ్యాన్స్‌ మాస్టర్లను పెట్టుకుని డ్యాన్స్‌ ప్రాక్టీస్‌ చేసేవారు. పార్టీల్లో డ్యాన్స్‌లు చేస్తూ అందరినీ తనవైపు ఆకర్షించేవారు. ఆత్మరక్షణ కోసం నాన్‌చాక్‌ తిప్పడం కూడా నేర్చుకోవడం విశేషం. ప్రస్తుతం ఇందుకు సంబంధించిన వీడియోలు సోషల్‌ మీడియాలో హల్‌చల్ చేస్తున్నాయి.

Tags: esi scam, devika rani, daily lifestyle, pharmacist, esi medicine scam details

తెలంగాణలో మద్యం ధరలకు రెక్కలు

  • కొత్తపాలసీ అమల్లోకి రావడంతో సర్కారు నిర్ణయం
  • ఏపీ మార్గంలోనే కేసీఆర్‌ ప్రభుత్వం
  • ఖాళీ షాపులను ప్రభుత్వమే నడపాలని నిర్ణయం

తెలంగాణ రాష్ట్రంలో మద్యం కొత్తపాలసీ అమల్లోకి రావడంతోపాటు ధరలకు కూడా త్వరలో రెక్కలు వచ్చే అవకాశం ఉందని భావిస్తున్నారు. ఇటీవల ప్రభుత్వం ప్రకటించిన కొత్త పాలసీ ఈరోజు నుంచి అమల్లోకి వచ్చిన విషయం తెలిసిందే. రెండేళ్ల కాలపరిమితికిగాను (2019-21) ఎక్సైజ్‌ శాఖ ఈ పాలసీని ప్రకటించింది. రాష్ట్ర వ్యాప్తంగా మొత్తం 2,216  దుకాణాలకు అనుమతి ఇచ్చిన ప్రభుత్వం ఎక్సైజ్‌ శాఖ ఆధ్వర్యంలో 19 డిపోల ద్వారా వీటికి మద్యం సరఫరాకు ఏర్పాట్లు చేసింది.

2021 అక్టోబరు 31 వరకు అమల్లో ఉన్న కొత్తపాలసీ ద్వారా ప్రభుత్వ ఖజానాకు 1467 కోట్ల రూపాయల భారీ ఆదాయం సమకూరింది. దీనికి అదనంగా మద్యం ధరలను కూడా పెంచి మరికొంత ఆదాయాన్ని రాబట్టాలని ప్రభుత్వం నిర్ణయించినట్లు తెలిసింది.

ఇందుకుగాను ఇటీవల ఏపీ ప్రభుత్వం తన కొత్త మద్యం విధానంలో 15 నుంచి 20 శాతం ధరలు పెంచడంతో, అదే విధానాన్ని తాము కూడా ఆచరించాలని ప్రభుత్వం సూత్రప్రాయంగా నిర్ణయించినట్లు సమాచారం. అలాగే, దుకాణాల నిర్వహణకు ఎవరూరాని చోట్ల ప్రభుత్వమే దుకాణాలు నడపాలని నిర్ణయించినట్లు తెలుస్తోంది.

Tags: Abcari Policy, Price Increased, 20 Percent

Telangana, KCR, RTC Strike, tsrtc jac

ఆర్టీసీ కార్మిక సంఘాలతో చర్చలకు కేసీఆర్ ఓకే.. నేడు చర్చలు?

  • ఆర్టీసీ సమ్మెపై నాలుగు గంటలపాటు సీఎం సమీక్ష
  • నేడు కార్మిక సంఘాలతో భేటీ కానున్న ఆర్టీసీ ఎగ్జిక్యూటివ్ డైరెక్టర్ల కమిటీ
  • తమకు సమాచారం లేదన్న అశ్వత్థామరెడ్డి

ఆర్టీసీ కార్మికులతో చర్చలకు ముఖ్యమంత్రి కేసీఆర్ గ్రీన్ సిగ్నల్ ఇచ్చినట్టు తెలుస్తోంది. రవాణాశాఖ మంత్రి పువ్వాడ అజయ్‌కుమార్, ఆ సంస్థ ముఖ్యకార్యదర్శి, ఇన్‌చార్జ్ ఎండీ సునీల్ శర్మ, ఆర్టీసీ ఎగ్జిక్యూటివ్ డైరెక్టర్లు తదితరులతో ప్రగతి భవన్‌లో నిన్న సాయంత్రం నాలుగు గంటలపాటు జరిపిన సుదీర్ఘ సమీక్ష అనంతరం కార్మికులను చర్చలకు పిలవాలని కేసీఆర్ నిర్ణయించినట్టు తెలుస్తోంది. ముఖ్యమంత్రి ఆదేశాలతో నేడు కార్మిక సంఘాల నాయకులతో ఆర్టీసీ ఎగ్జిక్యూటివ్ డైరెక్టర్ల కమిటీ బస్‌భవన్‌లో సమావేశం కానుందని సమాచారం.

నేటి ఉదయం కార్మిక సంఘాలకు చర్చలకు సంబంధించిన సమాచారం ఇవ్వనున్నారు. అయితే, చర్చలపై ప్రభుత్వం నుంచి అధికారికంగా ఎటువంటి ప్రకటన విడుదల కాలేదు. చర్చల విషయమై ప్రభుత్వం నుంచి తమకు ఎటువంటి సమాచారం లేదని ఆర్టీసీ కార్మిక సంఘాల జేఏసీ కన్వీనర్ అశ్వత్థామరెడ్డి తెలిపారు.
Tags: Telangana, KCR, RTC Strike, tsrtc jac

వచ్చే 24 గంటల్లో అతి తీవ్ర తుపాను.. హెచ్చరికలు జారీ

  • అరేబియా సముద్రంలో అల్పపీడనం
  • వచ్చే 12 గంటల్లో తుపానుగా మారనున్న వైనం
  • తెలంగాణలో భారీ వర్షాలకు అవకాశం

అరేబియా సముద్రంలో కొనసాగుతున్న అల్పపీడనం వచ్చే 24 గంటల్లో అతి తీవ్ర తుపానుగా మారనుందని హైదరాబాద్ వాతావరణ కేంద్రం తెలిపింది. ప్రస్తుతం కొనసాగుతున్న అల్పపీడనం రానున్న 12 గంటల్లో తుపానుగా మారుతుందని, ఆపై అతి తీవ్ర తుపానుగా రూపాంతరం చెందుతుందని వివరించింది. దీని ప్రభావంతో తెలంగాణలో ఒకటి రెండు చోట్ల భారీ వర్షాలు కురిసే అవకాశం ఉందని, అప్రమత్తంగా ఉండాలని హెచ్చరించింది.
Tags: Telangana, Arabian Sea Cyclone, Rains

TSRTC Employee Daughter question to KCR

సీఎం సారూ…ఇదేనా బంగారు తెలంగాణ?: ఆర్టీసీ ఉద్యోగి కుమార్తె ప్రశ్న

  • జీతం లేక నా ఫీజులు కూడా నాన్న కట్టలేదు
  • ఆర్థిక ఇబ్బందులతో కొందరు ఆత్మహత్యకు పాల్పడుతున్నారు
  • ఇంకా ఎంతమంది చనిపోతే స్పందిస్తారో కేసీఆర్‌ చెప్పాలి

ఆర్టీసీ సమ్మె, ప్రభుత్వం తీరు నేపథ్యంలో ఓ ఆర్టీసీ ఉద్యోగి కుమార్తె ముఖ్యమంత్రి కేసీఆర్‌పై ప్రశ్నల వర్షం కురిపించింది. ‘మీరు తెస్తామన్న బంగారు తెలంగాణ ఇదేనా?’ అని సూటిగా ప్రశ్నించింది. బంగారు తెలంగాణ అంటే ఉద్యోగాలు ఇవ్వాలిగాని, ఉన్న ఉద్యోగాలను తీసేయడం కాదని విమర్శించింది.

ఈరోజు ఆమె ఓ చానెల్‌ ప్రతినిధితో మాట్లాడుతూ సమ్మె సమస్యను పరిష్కరించడంలో కేసీఆర్‌ ప్రభుత్వం విఫలం కావడం వల్ల తన లాంటి చాలా మంది విద్యార్థుల జీవితాలు రోడ్డున పడ్డాయని బాలిక ఆవేదన వ్యక్తం చేసింది. సమ్మె కారణంగా సంస్థ జీతాలు చెల్లించకపోవడంతో తన కాలేజి ఫీజులు తండ్రి కట్టలేకపోయారని కన్నీటిపర్యంతమయింది.

ఇప్పటికే కొంతమంది ఆర్టీసీ కార్మికులు ఆత్మహత్యకు పాల్పడ్డారని, ఇంకా ఎంతమంది చనిపోతే ముఖ్యమంత్రి స్పందిస్తారో తెలియజేయాలని నిలదీసింది. ‘తమ సమస్యలు పరిష్కరించాలనే కదా కార్మికులు అడుగుతున్నారు. ఏం తప్పు చేశారని మా అమ్మానాన్నలను పోలీస్ స్టేషన్ కు తీసుకువెళ్లారు?’ అంటూ నిలదీసింది.

సమ్మె మొదలైనప్పటి నుంచి తన తల్లి ఒక్కరోజు కూడా సరిగా భోజనం చేయలేదని, తమ భవిష్యత్తు ఏమవుతుందో అని కుంగిపోతోందని కన్నీరుపెట్టింది.

తీవ్ర పని ఒత్తిడితో… ఆసుపత్రి పాలైన భద్రాచలం ఆర్టీసీ డీఎం!

  • గత 19 రోజులుగా డ్యూటీలో
  • కళ్లు తిరిగి పడిపోయిన బి.శ్రీనివాస్
  • స్వల్ప గుండెపోటుకు గురయ్యారన్న వైద్యులు

గడచిన 19 రోజులుగా తెలంగాణ ఆర్టీసీలో సమ్మె జరుగుతున్న నేపథ్యంలో, సమ్మెలో పాల్గొనకుండా విధుల్లో తలమునకలైన భద్రాచలం డిపో మేనేజర్, స్పృహ కోల్పోయి, ప్రాణాల మీదకు తెచ్చుకున్నారు. తీవ్రమైన పని ఒత్తిడితో సతమతమవుతున్న భద్రాచలం ఆర్టీసీ డీఎం బి.శ్రీనివాస్ బుధవారం తెల్లవారుజామున కళ్లుతిరిగి పడిపోయారు. దీన్ని గమనించిన ఆర్టీసీ సెక్యూరిటీ సిబ్బంది, వెంటనే ఆయన్ను చికిత్స నిమిత్తం భద్రాచలం ఏరియా ఆస్పత్రికి తరలించారు.

ఆయన స్వల్ప గుండెపోటుకు గురైనట్టు గమనించిన వైద్యులు, ఈసీజీ తదితర టెస్టులు నిర్వహించారు. విశ్రాంతి లేని కారణంగానే, లో బీపీతో శ్రీనివాస్ స్పృహ కోల్పోయినట్లు వైద్యులు తెలిపారు. గడచిన రెండున్నర వారాలుగా ఆర్టీసీ బస్ స్టేషన్, బస్ డిపో నిర్వహణ బాధ్యతలు ఆయనే చూస్తున్నారు. ఇంటికి వెళ్లే సమయం కూడా లేకుండా విధులు నిర్వహిస్తున్నారు.

ప్రస్తుతం ఆయన పరిస్థితి కుదుటపడిందని, చికిత్స జరుగుతోందని వైద్య వర్గాలు వెల్లడించాయి. తమ డిపో డీఎం సృహ కోల్పోయారన్న విషయం తెలుసుకున్న ఆర్టీసీ జేఏసీ నేతలు, ఉద్యోగులు ఆసుపత్రికి వెళ్లి ఆయన్ను పరామర్శించారు.