ESI Scam నిందితురాలు దేవికారాణి లీలలు

  • ఈఎస్ఐ స్కాంలో శ్రీనివాసరెడ్డి అరెస్ట్
  • విచ్చలవిడిగా వచ్చి పడుతున్న డబ్బుతో జల్సాలు
  • కోట్లకు పడగలెత్తిన సాధారణ ఫార్మసిస్ట్ నాగలక్ష్మి

ఈఎస్ఐ ఇన్సూరెన్స్‌ మెడికల్‌ సర్వీసెస్‌ (ఐఎంఎస్‌) మాజీ డైరెక్టర్‌ దేవికారాణి కేసులో విస్తుపోయే విషయాలు బయటకు వస్తున్నాయి. అక్రమంగా సంపాదించిన సొమ్ముతో ఆమె విలాసవంతమైన జీవితం గడిపినట్టు ఏసీబీ అధికారులు గుర్తించారు. విలాసాల కోసం ఆమె వెచ్చించిన సొమ్ము, అక్రమాస్తులు ఎలా సంపాదించిందీ ఆరాతీస్తున్నారు. అంతేకాదు, సాధారణ ఫార్మసిస్టు అయిన కొడాలి నాగలక్ష్మి కూడా కోట్లకు పడగలెత్తడం అధికారులను ఆశ్చర్యపరుస్తోంది. ఈ కేసులో ఏసీబీ అధికారులు నిన్న తేజ ఫార్మా ఎండీ సోదరుడు శ్రీనివాసరెడ్డిని అరెస్ట్ చేశారు.

కాగా, అక్రమంగా కోట్లాది రూపాయలు సంపాదించిన నిందితులు దేవికారాణి, నాగలక్ష్మి, రాజేశ్వర్‌రెడ్డి, శ్రీనివాసరెడ్డిలు విలాసాల కోసం డబ్బును విచ్చలవిడిగా ఖర్చు చేసినట్టు అధికారులు గుర్తించారు. విచ్చలవిడిగా డబ్బు వచ్చిపడుతుంటే ఏం చేయాలో తోచక జల్సాలకు అలవాటు పడ్డారు. ఖరీదైన హోటళ్లలో బర్త్‌డే పార్టీలు, విందులు, వినోదాలు, పబ్‌లలో ఎంజాయ్ చేసినట్టు అధికారుల విచారణలో తేలింది.

అంతేకాదు, పార్టీలలో దేవికారాణి ప్రత్యేకంగా కనిపించేందుకు ఉబలాటపడేవారు. బ్యూటీషియన్లను పిలిపించుకుని అందంగా తయారయ్యేవారు. డ్యాన్స్‌ మాస్టర్లను పెట్టుకుని డ్యాన్స్‌ ప్రాక్టీస్‌ చేసేవారు. పార్టీల్లో డ్యాన్స్‌లు చేస్తూ అందరినీ తనవైపు ఆకర్షించేవారు. ఆత్మరక్షణ కోసం నాన్‌చాక్‌ తిప్పడం కూడా నేర్చుకోవడం విశేషం. ప్రస్తుతం ఇందుకు సంబంధించిన వీడియోలు సోషల్‌ మీడియాలో హల్‌చల్ చేస్తున్నాయి.

Tags: esi scam, devika rani, daily lifestyle, pharmacist, esi medicine scam details

Pegasus Israel Whatsapp Spyware

వాట్సాప్ లో చొరబడిన స్పైవేర్… హ్యాకింగ్ బారిన ప్రముఖుల ఫోన్లు

  • ఇజ్రాయెల్ లో పురుడుపోసుకున్న ‘పెగాసస్’ స్పైవేర్
  • వాట్సాప్ భద్రతను అపహాస్యం చేసిన సైబర్ భూతం
  •  ప్రపంచవ్యాప్తంగా 1400 మంది ప్రముఖులకు తప్పని ‘పెగాసస్’ బెడద

వాట్సాప్ ను సమాచార భద్రత పరంగా అత్యుత్తమ ప్లాట్ ఫామ్ గా భావిస్తుంటారు. ఎండ్ టు ఎండ్ ఎన్ క్రిప్షన్ సెక్యూరిటీతో చాటింగ్ తదితర కార్యకలాపాలు ఎంతో సురక్షితమని వాట్సాప్ ఇప్పటివరకు చెబుతూ వచ్చింది. అయితే, వాట్సాప్ కూడా హ్యాకింగ్ కు అతీతం కాదని తేలింది. ఇజ్రాయెల్ లో ఉద్భవించిన ‘పెగాసస్’ అనే స్పైవేర్ వాట్సాప్ లో ప్రవేశించిందని, ప్రపంచవ్యాప్తంగా 1400 మంది జర్నలిస్టులు, మానవ హక్కుల కార్యకర్తల ఫోన్లలో ఇది తిష్టవేసిందని స్వయంగా వాట్సాప్ యాజమాన్యం ప్రకటించింది.

వాట్సాప్ లో ‘పెగాసస్’ స్పైవేర్ ను తాము ఈ ఏడాది వేసవిలోనే గుర్తించి అడ్డుకున్నామని, వెంటనే ప్రభావిత వ్యక్తులకు సమాచారం అందించామని వాట్సాప్ వెల్లడించింది. వాట్సాప్ లో వీడియో, ఆడియో కాల్స్ వ్యవస్థ అయిన వీఓఐపీ స్టాక్ లో ఉన్న లోపం హ్యాకర్ల పాలిట వరమైంది. ఈ లోపాన్ని ఆధారంగా చేసుకుని హ్యాకర్లు ‘పెగాసస్’ స్పైవేర్ ను వాట్సాప్ లోకి చొప్పించగలిగారు.

ఈ స్పైవేర్ ఒక్కసారి ఫోన్ లో ప్రవేశించాక కీలక సమాచారాన్నంతా నిర్దేశిత సర్వర్ కు పంపుతుంది. వాట్సాప్ ను ఎప్పటికప్పుడు అప్ డేట్ చేసుకుంటుండడం ద్వారా స్పైవేర్ ప్రభావం నుంచి బయటపడొచ్చని సైబర్ నిపుణులు అంటున్నారు.

Tags: Pegasus virus, Israel Whatsapp, Spyware, voip stack, video calls

HIV AIDS, Andhra Pradesh, Telangana

ఏపీలో 1.82 లక్షల మంది ఎయిడ్స్ రోగులు.. దేశంలో రెండోస్థానం

  • దేశవ్యాప్తంగా 12.73 లక్షల మంది ఎయిడ్స్ రోగులు
  • ఐదో స్థానంలో తెలంగాణ
  • వెల్లడించిన జాతీయ హెల్త్ ప్రొఫైల్ నివేదిక

హెచ్ఐవీ, ఎయిడ్స్ రోగులు అత్యధికంగా కలిగిన రాష్ట్రాల్లో ఆంధ్రప్రదేశ్ రెండో స్థానంలో నిలిచింది. డిసెంబరు 2018 నాటికి దేశవ్యాప్తంగా 12.73 లక్షల మంది హెచ్ఐవీ, ఎయిడ్స్‌తో బాధపడుతున్నట్టు జాతీయ హెల్త్ ప్రొఫైల్ నివేదిక పేర్కొంది.

వీరిలో ఏకంగా 1.82 లక్షల మంది ఏపీలోనే ఉండడం గమనార్హం. ఫలితంగా ఈ జాబితాలో ఏపీ రెండో స్థానంలో నిలిచింది. 78 వేల మందితో తెలంగాణ ఐదో స్థానంలో ఉంది.

Tags: HIV AIDS, Andhra Pradesh, Telangana

అపరిశుభ్ర వాతావరణంలో జొమాటో బ్యాగులు.. లక్ష రూపాయల జరిమానా

చెన్నైలో పెరుగుతున్న డెంగీ కేసులు
నివారణ చర్యలు చేపట్టిన అధికారులు
అపరిశుభ్రంగా ఉన్న కార్యాలయాలు, సంస్థలకు జరిమానాలు
ఆన్‌లైన్ ఫుడ్ డెలివరీ సంస్థ జొమాటోకు చెన్నై కార్పొరేషన్ అధికారులు లక్ష రూపాయల జరిమానా విధించారు. చెన్నైలో ఇటీవల డెంగీ కేసులు ఎక్కువగా నమోదవుతుండడంతో స్పందించిన అధికారులు నివారణ చర్యలు చేపట్టారు.

ఈ నేపథ్యంలో అపరిశుభ్ర పరిసరాలను గుర్తించేందుకు ప్రత్యేకంగా తనిఖీలు చేపడుతున్నారు. అపరిశుభ్రంగా కనిపించిన సంస్థలు, కార్యాలయాలకు కార్పొరేషన్ అధికారులు ఎక్కడికక్కడ జరిమానాలు విధిస్తున్నారు. ఈ నేపథ్యంలో నగరంలోని చేట్‌పెట్‌ ఎంసీ నికల్సన్‌ రోడ్డులోని ఓ భవనంలో అపరిశుభ్ర వాతావరణంలో ఉన్న జొమాటో బ్యాగులను గుర్తించిన అధికారులు ఆ సంస్థకు లక్ష రూపాయల జరిమానా విధించారు.
Tags: zomato bag, chennai corporation, fine 1 lack, dengue

dilli babu reddy

సత్యనారాయణ హంతకులను తక్షణం అరెస్టు చేయాలి: డిజిపికి ఎపి ఎంఎఫ్ వినతి

అమరావతి, అక్టోబర్ 16: తూర్పుగోదావరి జిల్లా తొండంగి అర్బన్ ఆంధ్రజ్యోతి రిపోర్టర్ కాతా సత్యనారాయణ హత్య దారుణమైన సంఘటన అని ఆంధ్రప్రదేశ్ మీడియా ఫెడరేషన్ రాష్ట్ర ప్రధాన కార్యదర్శి పి. డిల్లీబాబు రెడ్డి ఆందోళన వ్యక్తం చేశారు. సత్యనారాయణ హంతకులను తక్షణం అరెస్టు చేయాలని డిమాండ్ చేశారు. ఈ మేరకు బుధవారం నాడు డిజిపి గౌతమ్ సవాంగ్, హోం శాఖ ప్రిన్సిపల్ కార్యదర్శి కిషోర్ లతో పాటు ప్రెస్ కౌన్సిల్ ఆఫ్ ఇండియాకు ఎపిఎంఎఫ్ ప్రధాన కార్యదర్శి ఫిర్యాదు చేశారు. జర్నలిస్టుగా విధి నిర్వహణ పూర్తి చేసుకుని మంగళవారం రాత్రి ఎస్. అన్నవరంలోని తన నివాసానికి చేరుకుంటున్న సత్యనారాయణ ను తన ఇంటి సమీపంలోనే దుండగులు దారి కాచి కిరాతకంగా హత్య చేశారని ఆ ఫిర్యాదులో పేర్కొన్నారు. సత్యనారాయణపై గత నెలలో కూడా హత్యాయత్నం జరిగిందని, దీనిపై తుని రూరల్ పోలీసులకు ఫిర్యాదు చేస్తే కేసు నమోదు చేయకుండా తాత్సారం చేశారని ఆరోపించారు.

అప్పుడే పోలీసులు తగిన రీతిలో స్పందించి నిందితులపై చర్యలు తీసుకుని ఉంటే ఈ హత్య జరిగి ఉండేది కాదని డిల్లీబాబు వ్యాఖ్యానించారు. సత్యనారాయణ హంతకులపై కఠిన చర్యలు తీసుకోవాలని, అతని కుటుంబ సభ్యులను ఆదుకోవాలని ఆయన ప్రభుత్వాన్ని డిమాండ్ చేశారు. గత నాలుగు నెలలుగా రాష్ట్రంలో జర్నలిస్టులపై దాడులు పెరిగిపోతున్నాయని డిల్లీబాబు ఆందోళన వ్యక్తం చేశారు. నెల్లూరులో జమీన్ రైతు ఉపసంపాదకుడిపై దాడి జరిగిందని, అనంతపురంలో జర్నలిస్టు బాబ్జాన్ పైన దాడి జరిగిందని వివరించారు. చీరాలలో మాజీ ఎమ్మెల్యే ఆమంచి కృష్ణ మోహన్ అనుచరులు స్వయంగా అక్కడి విశాలాంధ్ర రిపోర్టర్ నాగార్జునరెడ్డి పై దాడికి పాల్పడ్డారని గుర్తు చేశారు. ఇటువంటి సంఘటనలపై ప్రభుత్వం కఠిన చర్యలు తీసుకోవాలని, దాడులు పునరావృతం కాకుండా చర్యలు తీసుకోవాలని ఢిల్లీ బాబు కోరారు. ఈ కార్యక్రమంలో స్మాల్ అండ్ మీడియం న్యూస్ పేపర్స్ అసోసియేషన్ ఆఫ్ ఆంధ్రప్రదేశ్ కార్యదర్శి బి. సతీష్ బాబు, ఎపిఎంఎఫ్ నాయకులు ఇందుకూరి వెంకట రామరాజు, ఎవివి సత్యనారాయణ తదితరులు పాల్గొన్నారు.

కూలీల అవతారం…చోరీలే అసలు వ్యాపకం

  • ఆలయాల్లో దొంగతనాలే ప్రధాన టార్గెట్‌
  • అంతర్రాష్ట్ర ముఠాను అరెస్టు చేసిన పోలీసులు
  • నిందితులు తూర్పుగోదావరి జిల్లా వాసులు

పగలంతా నిర్మాణ రంగంలో కూలీలుగా వ్యవహరిస్తూ రాత్రయితే వీలున్నచోట ఆలయాల్లో చోరీలకు పాల్పడుతున్న ఓ అంతర్రాష్ట్ర ముఠాను హైదరాబాద్‌ ఎల్పీనగర్‌ పోలీసులు అరెస్టు చేశారు. నెల రోజుల వ్వవధిలో ఈ ముఠా ఆరు ఆలయాల్లో దొంగతనాలకు పాల్పడినట్లు గుర్తించారు. పోలీసుల కథనం మేరకు…తూర్పుగోదావరి జిల్లా ఎటపాక మండలం తుమ్మలనగర్‌కు చెందిన పేరా నర్సింహ (23), మాదకం రమేష్‌ (22), రెడ్డిపాలెం గ్రామానికి చెందిన గుండి జగదీష్‌ (21), పినపాక గ్రామానికి చెందిన పెడియా సారయ్య (19)లు ఓ ముఠాగా ఏర్పడి చోరీకు పాల్పడుతున్నారు.

గతంలో ఖమ్మం, భద్రాచలం జిల్లాల్లోని పలు ప్రాంతాల్లోని ఆలయాల్లో చోరీలకు పాల్పడి జైలుకు కూడా వెళ్లారు. రెండు నెలల క్రితం జైలు నుంచి బయటకు వచ్చాక ఎల్‌బీనగర్‌ సమీపంలోని భరత్‌నగర్‌లో ఓ గది అద్దెకు తీసుకుని దిగారు. కొన్ని రోజులపాటు భవన నిర్మాణ కార్మికులుగా పనిచేస్తూనే ఆలయాపై దృష్టిసారించారు. ఎన్టీఆర్‌ నగర్‌, మున్సూరాబాద్‌, సాయినగర్‌ పరిధిలోని ఆరు ఆలయాల్లో దొంగతనాలకు పాల్పడ్డారు.

ఉప్పల్‌లో ఓ బైకు దొంగిలించారు. చోరీ చేసిన బండిపై తిరుగుతున్న వీరిని అనుమానించిన మఫ్టీలో పోలీసులు అదుపులోకి తీసుకుని ప్రశ్నించడంతో అసలు వ్యవహారం బయటపడింది. నిందితుల నుంచి రూ.6వేలు, ఓ బైకు, నకిలీ బంగారు పుస్తెలు, హారం స్వాధీనం చేసుకున్నారు.

హైదరాబాదులో విధ్వంసం సృష్టించిన పిడుగు

హైదరాబాదులో నిన్న సాయంత్ర భారీ వర్షం కురిసింది. లోతట్టు ప్రాంతాలు జలమయమయ్యాయి. రోడ్లు చెరువులను తలపించాయి. భారీ వర్షానికి జన జీవనం అస్తవ్యస్తమైంది. ఇదే సమయంలో చాదర్ ఘాట్ లోని ఓల్డ్ మలక్ పేట్ రేస్ కోర్స్ సమీపంలో ఓ ఇంటిపై పిడుగు పడింది. ఒక్క సారిగా భారీ శబ్దం రావడంలో ఇంట్లోని వారు బయటకు పరుగులు పెట్టారు.

అయితే, పిడుగు ధాటికి ఇంటి పైకప్పు, గోడలు బీటలు వారాయి. గోడ నుంచి పెచ్చులు ఊడి పడ్డాయి. ఈ ఘటనలో చుట్టుపక్కల వారు భయభ్రాంతులకు గురవుతున్నారు.
Tags: Hyderabad, Rain Thunder

జైల్లో భలే మంచి లాభసాటి బేరం…సిగరెట్‌ ప్యాకెట్‌ రూ.15 వేలు

  • రాజస్థాన్‌లోని అజ్మేర్‌ కేంద్ర కారాగారంలో వ్యాపారం
  • ధనిక ఖైదీలకు వీఐపీ సౌకర్యాలు
  • ఒక్కో అధికారి ఆదాయం నెలకు రూ.25 లక్షల పైమాటే

జైలు అంటే నాలుగు గోడల మధ్య వ్యవహారం. అక్కడ ఏం జరిగినా జైలు అధికారులు, సిబ్బందికి తప్ప మూడో ప్రపంచానికి తెలియడం కష్టం. అటువంటి చోట ‘ఏ ఆగడాలకు తెరతీస్తే ఏమవుతుంది, పైగా లాభసాటి వ్యాపారం’ అనుకున్నారో ఏమో అక్కడి అధికారులు. ఏకంగా సంపన్న ఖైదీల అవసరాలు తీరుస్తూ లక్షలు సంపాదిస్తున్నారు. ఇక్కడ సిగరెట్‌ ప్యాకెట్‌ రూ.12 వేల నుంచి  రూ.15 వేలు పలుకుతుందంటే వ్యాపారం ఏ స్థాయిలో సాగుతుందో ప్రత్యేకంగా చెప్పాలా.

వివరాల్లోకి వెళితే…రాజస్థాన్‌ రాష్ట్రం అజ్మీర్‌లో కేంద్ర కారాగారం ఉంది. ఈ జైల్లోని బ్యారెక్‌ ఒకటి నుంచి 15 వరకు గదుల్లో వీఐపీ ఖైదీలున్నారు. ఈ పదిహేను గదుల్లోని ఖైదీలు ప్రస్తుతం జైలు అధికారులు, సిబ్బందికి కాసులు కురిపించే కామధేనువుల్లా మారారు. ఈ ఖైదీలకు పరిశుభ్రమైన గదులు, ప్రత్యేక ఆహారం, ఉతికిన దుస్తులు వంటి సౌకర్యాలు కల్పిస్తున్నారు. ఇందుకుగాను వీరి నుంచి నెలకు అద్దె రూపేణా రూ.8 లక్షలు వసూలు చేస్తున్నారు.

ఈ వ్యవహారం ఇక్కడితో ఆగిపోలేదు. ఖైదీలకు అవసరమైన సిగరెట్లు, పొగాకు ఉత్పత్తులను భారీ మొత్తం వసూలు చేసి సరఫరా చేస్తున్నారు. ఒక సిగరెట్‌ ప్యాకెట్టుకు రూ.12 వేల నుంచి రూ.15 వేల వరకు వసూలు చేస్తున్నారంటే అర్థం చేసుకోవచ్చు. ఇక, పొగాకు ఉత్పత్తుల కోసం రూ.300 నుంచి రూ.500 వసూలు చేస్తున్నారు. ఈ వ్యవహారాల కారణంగా ఒక్కో అధికారి రూ.25 లక్షల వరకు సంపాదిస్తున్నారని తేలింది.

దీనిపై ఆరోపణలు గుప్పుమనడంతో దర్యాప్తు మొదలుపెట్టిన ఏసీబీ అధికారులు ఈ విషయాలు గుర్తించి నోరెళ్లబెట్టారు. బాధ్యులుగా భావిస్తున్న 12 మందిని ఇప్పటికే అరెస్టు చేశారు. ఈ సందర్భంగా ఓ ఏసీబీ అధికారి మాట్లాడుతూ ‘ ఈ వ్యవహారాలకు సంబంధించి జులైలోనే సమాచారం అందింది. ఈ అవినీతి ఇప్పటిది కాదు. ఏళ్లుగా సాగుతోంది’ అని చెప్పడం గమనార్హం.

Former BJP MP Chinmayanand, arrested , Uttar Pradesh SIT, Shahjahanpur, rape case

23 ఏళ్ల యువతిపై రేప్.. బీజేపీ నేత స్వామి చిన్మయానంద అరెస్ట్

  • ఉత్తరప్రదేశ్ లోని షాజహాన్ పూర్ లో ఘటన
  • యువతి స్నానం చేస్తుండగా వీడియో చిత్రీకరణ
  • బ్లాక్ మెయిల్ చేస్తూ ఏడాదిగా అత్యాచారం

లా చదువుతున్న 23 ఏళ్ల యువతిని సంవత్సరం పాటు రేప్ చేసిన కేసులో బీజేపీ నేత స్వామి చిన్మయానంద(73)ను ఉత్తరప్రదేశ్ పోలీసులు అరెస్ట్ చేశారు. లా కాలేజీలో సీటు ఇప్పిస్తానని ఆశపెట్టాడని బాధితురాలు పోలీసులకు ఫిర్యాదు చేసింది. తాను స్నానం చేస్తుండగా రహస్యంగా వీడియో తీసిన చిన్మయానంద.. తనను బ్లాక్ మెయిల్ చేస్తూ ఏడాది పాటు లైంగికదాడి చేశాడని బాధితురాలు ఫిర్యాదులో పేర్కొంది. ఇదే విషయాన్ని ఆమె కోర్టులో న్యాయమూర్తి ముందు కూడా చెప్పింది.

తుపాకీతో బెదిరించి తన చేత బలవంతంగా మసాజ్ కూడా చేయించుకున్నాడని సదరు లా విద్యార్థిని ఆవేదన వ్యక్తం చేసింది. దీంతో కోర్టు ఆదేశాల నేపథ్యంలో రంగంలోకి దిగిన యూపీ పోలీసులు ప్రత్యేక దర్యాప్తు బృందం(సిట్) ను ఏర్పాటు చేశారు. ఈరోజు ఉదయాన్నే షాజహాన్ పూర్ లోని చిన్మయానంద ఆశ్రమానికి చేరుకున్న సిట్ అధికారులు.. చిన్మయానందను అరెస్ట్ చేశారు. అనంతరం వైద్య పరీక్షల కోసం ఆసుపత్రికి తీసుకెళ్లారు.

Tags: Former BJP MP Chinmayanand, arrested , Uttar Pradesh SIT, Shahjahanpur, rape case

OLX తో జాగ్రత్త: గూగుల్ పే తో రూ.94 వేలు స్వాహా…

సైబర్  నేరస్థులు పంథా మార్చారు. ఇప్పటివరకు తక్కువ ధరకే వస్తువులను విక్రయిస్తామంటూ ఓఎల్ ఎక్స్ లో ప్రకటనలు ఇచ్చి బాధితుల నుంచి డబ్బు లాగేసేవారు. ఇప్పుడు కొత్త తరహాలో మోసానికి తెర లేపారు. ఓఎల్ ఎక్స్ లో ప్రకటనలను చూసి పాత వస్తువులను కొంటామంటూ బురిడీ కొట్టిస్తున్నారు. తాజాగా సైబరాబాద్  సైబర్ క్రైమ్  ఠాణా పరిధిలో గురువారం ఓ ఉదంతం వెలుగు చూసింది. సాఫ్ట్ వేర్ ఇంజినీర్ గా పనిచేసి ఇటీవలే మానేసిన కొండాపూర్ కు చెందిన ఓ మహిళ నేరస్థుల బారినపడి మోసపోయింది. ఫేస్  బుక్  ఖాతాలో ఓ పాత ఫ్రిజ్  ను విక్రయించేందుకు ఆమె ప్రకటన ఇచ్చింది. రూ.18 వేలకు విక్రయిస్తానంటూ పేర్కొంది. ఆ ప్రకటన చూసి ఓ అపరిచితుడు ఆమెకు ఫోన్ చేశాడు. ప్రకటనలోని ఫ్రిజ్  చిత్రాన్ని చూశానని.. తనకు నచ్చిందని చెప్పాడు. అడిగినంత సొమ్ము చెల్లిస్తానని అంగీకరించాడు.

ముందుగా ఆన్  లైన్  లో డబ్బు పంపించిన తర్వాతే వస్తువు తీసుకెళతాననీ చెప్పాడు. నిజమేనని బాధితురాలు నమ్మడంతో ఆ అపరిచితుడు పాచిక విసిరాడు. గూగుల్  పే యాప్  కు అనుసంధానమై ఉన్న చరవాణి నంబరు చెబితే డబ్బు పంపిస్తానన్నాడు. బాధితురాలు ఆ నంబరు చెప్పడంతో అపరిచితుడు వెంటనే తన ప్రణాళికను అమలు చేశాడు. తొలుత రూ.7వేలు పంపిస్తున్నానని చెప్పాడు. మరోవిడతగా మరింత సొమ్ము పంపిస్తున్నానన్నాడు. అలా ఆమెను నమ్మిస్తూ గూగుల్ పే యాప్ కు తాను పంపించే సందేశాలను యాక్సెప్ట్  చేయాలని సూచించాడు.

అయిదు విడతలుగా ఆమె అలాగే చేయడంతో మొత్తం ఆమె బ్యాంకు ఖాతా నుంచి రూ.94 వేలు మాయమయ్యాయి. మోసగాడు ఆమెకు డబ్బు పంపించే మిషతో ఆమె ఖాతా నుంచే డబ్బు లాగేసుకున్నాడని తేలింది. గూగుల్ పే యాప్ లో పే బదులుగా యాక్సెప్ట్ ఆప్షన్ ను ఎంచుకొని మోసానికి పాల్పడ్డట్లు గుర్తించారు. ఓఎల్ ఎక్స్ మోసాల్లో ఆరితేరిన భరత్ పూర్ నేరస్థులే ఇలా పంథా మార్చి డబ్బు కొల్లగొడుతున్నట్లు అనుమానిస్తున్నారు. అందుకే గూగుల్ పే యాప్ లో లావాదేవీలు నిర్వహించేటప్పుడు జాగ్రత్తగా వ్యవహరించాలని సైబర్ క్రైమ్ పోలీసులు సూచిస్తున్నారు.