Andhra Pradesh AP Cabinet Meet Amaravati

ఏపీ రాజధానిగా అమరావతి ఉంటుందా? పోతుందా?… శాసనసభలో నేడే బిల్లు!

అమరావతి…! ఆరేళ్ల క్రితం ఉమ్మడి ఏపీ నుంచి తెలంగాణ ప్రాంతం విడిపోయిన తర్వాత, కొత్తగా ఏర్పడిన ఆంధ్రప్రదేశ్ రాష్ట్రానికి రాజధానిగా గుంటూరు, విజయవాడల మధ్య ఏర్పడిన కొత్త నగరం. ఈ నగరంలో ఇప్పటికే సచివాలయం, అసెంబ్లీ, హైకోర్టు తదితర భవనాలతో పాటు ప్రజల నివాసానికి ఎన్నో భవంతులు సిద్ధమవుతున్నాయి. కానీ ఇది నిన్నటి మాట.

పాలన వికేంద్రీకరణ పేరిట, మూడు ప్రాంతాలుగా విభజించి, ఒక్కో చోట ఒక్కో విభాగాన్ని ఏర్పాటు చేయాలని, తాజాగా అధికారంలోకి వచ్చిన వైఎస్ఆర్ కాంగ్రెస్ పార్టీ నిర్ణయించింది. ఈ నిర్ణయాన్ని అమరావతిలో భూములను స్వచ్ఛందంగా ప్రభుత్వానికి ఇచ్చిన రైతులు తీవ్రంగా ఆక్షేపిస్తూ, గడచిన నెల రోజులకు పైగా నిత్యమూ ఆందోళనలు చేస్తున్నారు. ఇక నేటి నుంచి అసెంబ్లీ సమావేశాలు ప్రారంభం కానుండటం, తొలి రోజునే రాజధాని విభజన అంశంపై క్యాబినెట్ ఓ నిర్ణయం తీసుకుని, కొత్త బిల్లును అసెంబ్లీలో ప్రవేశ పెట్టనుండటంతో ఇప్పటికే అమరావతి అష్టదిగ్బంధమైంది.

రాజధాని, ముఖ్యంగా వెలగపూడి సచివాలయం, మందడం మీదుగా దారితీసే సీడ్ యాక్సెస్ రోడ్ తదితరాలను పోలీసులు దిగ్బంధం చేశారు. అసెంబ్లీలో వైసీపీకి ఎదురు లేకపోయినా, మండలిలో నూతన బిల్లులను వ్యతిరేకించాలని విపక్ష తెలుగుదేశం పార్టీ ఇప్పటికే నిర్ణయం తీసుకుంది.

రాష్ట్ర ప్రజలు మొత్తం ఇప్పుడు శాసనసభవైపు చూస్తూ, ప్రభుత్వ వ్యూహం, అమరావతి భవిష్యత్ ఏంటన్న విషయాలపై చర్చించుకుంటున్నారు. మూడు రాజధానుల బిల్లు అసెంబ్లీలో ఆమోదం పొందితే, రైతులు ఇచ్చిన భూముల పరిస్థితి ఏంటన్న ప్రశ్న తలెత్తుతుంది. వారిలో నెలకొన్న ఆగ్రహావేశాలను చల్లార్చేందుకు ప్రభుత్వం ఎటువంటి చర్యలు చేపడుతుందన్న చర్చ కూడా జరుగుతోంది.

అయితే, తమ పార్టీ అభివృద్ధి వికేంద్రీకరణకు మద్దతిస్తుందే తప్ప, పాలన వికేంద్రీకరణకు కాదని తెలుగుదేశం పార్టీ అంటోంది. అసెంబ్లీకి వచ్చే ఎమ్మెల్యేలు, ఎమ్మెల్సీలు మినహా, మిగతా తెలుగుదేశం పార్టీ ముఖ్య నేతలందరినీ పోలీసులు ఇప్పటికే హౌస్ అరెస్ట్ చేశారు. ప్రకాశం బ్యారేజ్ పై వాహనాల రాకపోకలను నియంత్రించారు. న్యాయమూర్తులు, న్యాయవాదులు, సచివాలయ ఉద్యోగులు, ఎమ్మెల్యేలు, ఎమ్మెల్సీలు మినహా మరెవరినీ బ్యారేజ్ పైకి అనుమతించడం లేదు.

ఇదిలావుండగా, ప్రభుత్వం ప్రవేశపెట్టే బిల్లులను అధ్యయనం చేసేందుకు తమకు కనీసం వారం రోజుల సమయం కావాలని అసెంబ్లీలో డిమాండ్ చేయాలని తెలుగుదేశం పార్టీ అధినేత చంద్రబాబునాయుడు భావిస్తున్నారు. ఇదే సమయంలో అధికార వైసీపీ సైతం వ్యూహాత్మకంగా అడుగులు వేస్తోంది. ఇప్పటికే రాజధానిపై ఆ పార్టీ స్పష్టమైన నిర్ణయానికి వచ్చినట్టు తెలుస్తోంది.

విశాఖపట్నంలో కార్యనిర్వహణ, అమరావతిలో శాసన, కర్నూలులో న్యాయ రాజధానులను ఏర్పాటు చేయాలని నిర్ణయం తీసేసుకున్నట్టు సమాచారం. రాష్ట్ర అభివృద్ధి, రాజధాని అంశాలపై రెండు కమిటీలు నివేదికలు ఇవ్వగా, అవి ప్రభుత్వానికి అనుకూలంగానే ఉన్నాయి. వీటిని తెలుగుదేశం, బీజేపీ, జనసేన, కాంగ్రెస్, సీపీఐ వ్యతిరేకిస్తుండగా, ప్రభుత్వం ఓ హై పవర్ కమిటీని వేసిన సంగతి తెలిసిందే.

హై పవర్ కమిటీ కూడా తన నివేదికను ప్రభుత్వానికి అందించింది. ఈ కమిటీ రిపోర్టు కూడా ప్రభుత్వానికి అనుకూలంగానే ఉంది. దీనిపై ఈ ఉదయం, వైఎస్ జగన్ నేతృత్వంలో సమావేశం కానున్న రాష్ట్ర క్యాబినెట్ కీలక నిర్ణయం తీసుకోనుంది. ఆపై హై పవర్ కమిటీ నివేదిక అసెంబ్లీకి రానుండగా, అమరావతి భవితవ్యం మరో రెండు రోజుల్లో తేలనుంది.
Tags: Amaravati Assembly,Jagan YSRCP,Chandrababu

Nalgonda District,Chanduru Lakkireddy,Gudem Telangana,Municipal Elections

ఓట్ల కోసం అభ్యర్థి మాస్టర్ ప్లాన్… నల్గొండ జిల్లాలో ఊరంతా ఖాళీ!

అది నల్గొండ జిల్లా చండూరు మండలం లకినేని గూడెం. ఇక్కడి మూడో వార్డు పరిధిలో దాదాపు 800 మందికి పైగా నివాసం ఉంటుండగా, సుమారు 520 ఓట్లు ఉన్నాయి. ఇక తెలంగాణలో స్థానిక ఎన్నికలు జరుగుతున్న వేళ, ఆయా పార్టీలు ఓట్ల కోసం అందరినీ గ్రామం నుంచి తరలించడంతో ఇప్పుడా గ్రామం బోసిపోయింది.

ఓటర్లను సమీపంలోని కోళ్లఫామ్ లకు తరలించిన అభ్యర్థులు, వారికి అవసరమైన సమస్త సౌకర్యాలనూ కల్పిస్తున్నారు. నిన్న ఉదయం ఓటర్లను తరలించిన అభ్యర్థులు, అల్పాహారం, మధ్యాహ్న భోజనం, రాత్రి విందు, ఆపై మద్యం తదితరాలను సరఫరా చేసినట్టు సమాచారం. ఇక మందు కొట్టిన తరువాత ఎవరైనా వివాదాలకు దిగుతారని భావించిన అభ్యర్థులు, వారిని గ్రూపులుగా విడదీసి, దూరంగా ఉండే ఇతర షెడ్లలో విశ్రాంతి ఏర్పాట్లను చేశారట. కాగా, తెలంగాణలో మునిసిపల్ ఎన్నికల ప్రచారానికి నేటితో తెరపడనుండగా, రెండు రోజుల్లో పోలింగ్ జరుగనున్న సంగతి తెలిసిందే.
Tags: Nalgonda District,Chanduru Lakkireddy,Gudem Telangana,Municipal Elections

సాయి జన్మస్థలంపై వివాదం… షిరిడీలో బంద్ విరమణ

మహారాష్ట్రలోని షిరిడీలో సాయిబాబా జన్మభూమి వివాదం నేపథ్యంలో నిర్వహించిన బంద్ ను విరమించారు. పాథ్రీ ప్రాంతాన్ని సాయి జన్మస్థలంగా పేర్కొనడాన్ని వ్యతిరేకిస్తూ షిరిడీ వాసులు బంద్ కు పిలుపునిచ్చిన సంగతి తెలిసిందే. తాజాగా బంద్ ను విరమిస్తున్నట్టు ప్రకటించారు. రేపు సీఎం ఉద్ధవ్ ఠాక్రేతో సమావేశం తర్వాత తదుపరి కార్యాచరణ ఉంటుందని తెలిపారు. ఇటీవల పర్బని జిల్లాలోని పాథ్రీలో సాయి జన్మస్థానం వసతుల కల్పనకు మహారాష్ట్ర ప్రభుత్వం రూ.100 కోట్లు కేటాయిస్తున్నట్టు ప్రకటించడంతో వివాదం రాజుకుంది. పాథ్రీనే సాయి జన్మస్థలమని చెప్పేందుకు ఆధారాలు లేవని షిరిడీ ప్రజలంటున్నారు. అటు, షిరిడీ వాసుల బంద్ కు ప్రతిగా పాథ్రీలో పాథ్రీ కృతి సమితి బంద్ కు పిలుపునిచ్చింది.
Tags: Shirdi Maharashtra, Saibaba Padhri, Udhav Thackerey

Tirumala Tirupati Ladoo Free, Dharmareddy

తిరుమలలో భక్తులందరికీ ఉచిత లడ్డూ.. నేటి నుంచే అమలు!

తిరుమల వెంకన్నను దర్శించుకునే భక్తులు అత్యంత ప్రీతిపాత్రంగా భావించే లడ్డూ ప్రసాదం, ఇకపై ఉచితంగానే భక్తుల చేతిలోకి రానుంది. స్వామిని దర్శించుకున్న ప్రతి ఒక్కరికీ ఓ లడ్డూను ఫ్రీగా అందించాలని టీటీడీ తీసుకున్న నిర్ణయం, ఈ ఉదయం నుంచి అమలులోకి వచ్చింది. ప్రస్తుతం అలిపిరి, శ్రీవారిమెట్టు మార్గాల నుంచి నడచి వచ్చిన 20 వేల మంది భక్తులకు మాత్రమే ఉచిత లడ్డూను ఇస్తున్నామని, ఇకపై ప్రతి భక్తుడికి లడ్డూ ప్రసాదం ఉచితంగా ఇవ్వడం జరుగుతుందని అధికారులు తెలిపారు.

కాగా, అదనంగా లడ్డూలు కావాల్సిన వారికి ఒక్కో లడ్డూ రూ. 50పై ఎన్నయినా అందిస్తామని, అందుకు ఏర్పాట్లు జరిగాయని టీటీడీ అదనపు ఈఓ ఏవీ ధర్మారెడ్డి పేర్కొన్నారు. ప్రస్తుతం నాలుగు ఎల్పీటీ కౌంటర్లు పనిచేస్తుండగా, భక్తుల సౌకర్యం మేరకు వాటి సంఖ్యను 12కు పెంచామని ఆయన అన్నారు. లడ్డూల కొరత లేకుండా చూసేందుకు నిత్యమూ 4 లక్షల లడ్డులను సిద్ధం చేస్తామని తెలిపారు.
Tags: Tirumala Tirupati Ladoo Free, Dharmareddy

allu arjun, Trivikram,Ala Vaikunthapuramuloo,Fight Song

పాట‌లో ఫైట్.. త్రివిక్ర‌మ్ సూప‌రంతే

సినీ రంగంలో విజ‌యాలు ఎవ‌రికైనా వ‌స్తాయి. కానీ గౌర‌వం అంద‌రికీ రాదు. త్రివిక్ర‌మ్ శ్రీనివాస్ లాంటి కొద్ది మంది మాత్ర‌మే అది సంపాదిస్తారు. ర‌చ‌యిత‌గా త్రివిక్ర‌మ్ సంపాదించుకున్న పేరు ప్ర‌ఖ్యాతుల గురించి కొత్త‌గా చెప్పాల్సిన ప‌ని లేదు. ద‌ర్శ‌కుడిగా కూడా ఒక‌ప్పుడు త్రివిక్ర‌మ్ స్థాయే వేరుగా ఉండేది. కానీ గ‌త కొన్నేళ్ల‌లో త‌న స్థాయికి త‌గ‌ని కొన్ని సినిమాలు తీసి గౌర‌వాన్ని త‌గ్గించుకున్నాడు మాట‌ల మాంత్రికుడు.

ఐతే అల వైకుంఠ‌పుర‌ములో సినిమాతో మ‌ళ్లీ త్రివిక్ర‌మ్ త‌న పూర్వ‌పు స్థాయిని అందుకున్నాడు. ఇందులో ర‌చ‌యిత‌గా, ద‌ర్శ‌కుడిగా త్రివిక్ర‌మ్ టాప్ ఫామ్‌లో క‌నిపించాడు. ఈ సినిమా క్లైమాక్స్‌కు ముందు వ‌చ్చే ఫైట్ త్రివిక్ర‌మ్ ఎలాంటి ఫాంలో ఉన్నాడో చెప్ప‌డానికి ఒక ఉదాహ‌ర‌ణ‌.

సిత్తరాల సిరపడు.. సిత్తరాల సిరపడు అంటూ సాగే శ్రీకాకుళం జాన‌ప‌దం బ్యాగ్రౌండ్లో వ‌స్తుండ‌గా.. క్లైమాక్స్ ఫైట్ పెట్ట‌డం త్రివిక్ర‌మ్‌కే చెల్లింది. గ‌తంలోనూ కొన్ని సినిమాల్లో పాట‌ల బ్యాక్ డ్రాప్‌లో ఫైట్లు వ‌చ్చాయి కానీ.. త్రివిక్ర‌మ్ మాత్రం ఈ ఫైట్‌ను చాలా ఎఫెక్టివ్‌గా తీశాడు. ఫైట్లు రొటీన్‌గా తీస్తార‌ని పేరున్న‌ రామ్ ల‌క్ష్మ‌ణ్ ఈ యాక్ష‌న్ సీక్వెన్స్‌ను మాత్రం భ‌లేగా చేశారు.

ఒక పొయెటిక్ ఫీలింగ్ క‌లుగుతుంది ఈ ఫైట్ చూస్తే. త్రివిక్ర‌మ్ నుంచి ఆయ‌న అభిమానులు ఆశించేది ఇలాంటి మ్యాజిక్కే. ఈ సంద‌ర్భానికి అలాంటి పాట‌ను రాయించాల‌ని.. దాని బ్యాక్ డ్రాప్‌లో ఫైట్‌ను న‌డిపించాల‌ని త్రివిక్ర‌మ్ ఆలోచించ‌డ‌మే గ్రేట్. ఉత్త‌రాంధ్ర వాళ్ల‌కు ఈ సాంగ్ ఫైట్ భ‌లే కిక్కిస్తుంద‌న‌డంలో సందేహం లేదు. ఈ పాట‌ను విజ‌య్ కుమార్ అనేఉత్త‌రాంధ్ర‌ లిరిసిస్టే రాశాడు.
Tags: allu arjun, Trivikram,Ala Vaikunthapuramuloo,Fight Song

Andhra Pradesh AP Cabinet Meet Amaravati

ఏపీ కేబినెట్ మీటింగ్‌ నే

డు కాదు.. సోమవారమే!
ఆంధ్రప్రదేశ్ కేబినెట్ మీటింగ్ విషయంలో గందరగోళం నెలకొంది. సమావేశాన్ని తొలుత ఈ నెల 20న నిర్వహించనున్నట్టు మూడు రోజుల క్రితమే మంత్రులకు సమాచారం అందింది. అయితే, శుక్రవారం మధ్యాహ్నానికి తన నిర్ణయాన్ని మార్చుకున్న ప్రభుత్వం శనివారం మధ్యాహ్నం మూడు గంటలకు మీటింగ్ ఉంటుందని మంత్రులకు తెలియజేసింది. అయితే, రాత్రి కల్లా మళ్లీ ఈ నిర్ణయం మారిపోయింది. ముందుగా అనుకున్న ప్రకారమే సోమవారం ఉదయం 9 గంటలకే మీటింగ్ ఉంటుందని మళ్లీ మంత్రులకు సమాచారం అందించింది.

రాజధాని మార్పుకు సంబంధించి అసెంబ్లీలో బిల్లు ప్రవేశపెట్టడానికి ముందు గవర్నర్ అనుమతి తీసుకోవాల్సి ఉంటుంది. ఉదయం 9 గంటలకు మంత్రి మండలి ఆమోదిస్తే, దానిని గవర్నర్‌కు పంపి అనుమతి తీసుకుని రెండు గంటల్లోపే అసెంబ్లీ సమావేశాలకు తీసుకురావడంలో హడావుడి ఏర్పడుతుందని ప్రభుత్వం భావించింది. అందుకనే తొలుత శనివారమే కేబినెట్ మీటింగ్ పెట్టాలని నిర్ణయించారు.

అయితే, బిల్లుపై పూర్తిస్థాయిలో చర్చించి, మంత్రి మండలిలో ప్రవేశపెట్టడానికి కొంత సమయం తీసుకోవాలని తాజాగా నిర్ణయించినట్టు తెలుస్తోంది. కాబట్టి ఈ విషయంలో నిదానంగానే వ్యవహరించాలని ప్రభుత్వం భావించి మీటింగ్‌ను ముందుగా అనుకున్నట్టే సోమవారం ఉదయం 9 గంటలకు నిర్వహించాలని నిర్ణయించి, ఆ మేరకు మంత్రులకు సమాచారం పంపారు.
Tags: Andhra Pradesh AP Cabinet Meet Amaravati

Nagababu Janasena Andhra Pradesh ys jgan mohan reddy

డియర్ జగన్ రెడ్డి గారూ ఇది నా అభ్యర్థన: నాగబాబు

‘డియర్ జగన్ రెడ్డి గారూ ఇది నా అభ్యర్థన’ అంటూ జనసేన నేత నాగబాబు ట్వీట్లు చేశారు. ‘దయచేసి మీ తప్పులను సరిదిద్దుకుని, మిగిలిన నాలుగున్నరేళ్లు రాష్ట్రాన్ని పరిపాలించండి. మీకు అసెంబ్లీలో 151 మంది ఎమ్మెల్యేల బలం ఉంది. రాష్ట్రంలో సుపరిపాలన అందించాలని మీరు అనుకుంటే రాష్ట్ర ప్రజలతో గొడవ పెట్టుకోకండి, గందరగోళానికి గురవ్వకండి’ అని పేర్కొన్నారు.

‘మీ తప్పులను సరిదిద్దుకోవడానికి మీకు ఇప్పటికీ సమయం ఉంది. మీరు తప్పులు చేయాలని మేము కోరుకోము. మీరు చేసే తప్పుల ఆధారంగా రాజకీయ ప్రయోజనాలు పొందాలని మేము అనుకోము. ఇటువంటి ఆలోచనలు జనసేన పార్టీకి లేవు. మీ ఎమ్మెల్యేలను నియంత్రణలో పెట్టుకోండి.. మీ విక్టరీని వారు నాశనం చేస్తారు. మీ నిర్ణయాలను విమర్శించే అవకాశాన్ని మాకు ఇవ్వకండి. రాష్ట్ర ప్రజలందరినీ ఒకేలా చూస్తూ వారిని ప్రేమించండి.. మీ తండ్రి వైఎస్ రాజశేఖర్ రెడ్డి గారిలా చేయడానికి కనీసం ప్రయత్నమైనా చేయండి’ అని నాగబాబు చెప్పారు.
Tags: Nagababu Janasena Andhra Pradesh ys jgan mohan reddy

MIM Asaduddin Owaisi TRS BJP Congress

మజ్లిస్ ప్రధాన ప్రత్యర్థి టీఆర్ఎస్సే: అసదుద్దీన్ ఒవైసీ

తెలంగాణలో త్వరలో జరగనున్న మునిసిపల్ ఎన్నికల్లో తాము ఒంటరిగా బరిలోకి దిగడం వెనకున్న కారణాన్ని మజ్లిస్ చీఫ్ అసదుద్దీన్ ఒవైసీ వెల్లడించారు. ఓ ప్రముఖ పత్రికకు ఇచ్చిన ఇంటర్వ్యూలో ఆయన మాట్లాడుతూ.. టీఆర్ఎస్‌తో తమ స్నేహం కొనసాగుతుందని, అయితే, పట్టణ ప్రాంతాల్లో ఏ పార్టీకి ఎంత పట్టు ఉందో తెలుసుకునేందుకే ఒంటరిగా పోటీ చేస్తున్నట్టు తెలిపారు. మజ్లిస్ ఏ ఒక్క ప్రాంతానికో పరిమితమైన పార్టీ కాదని, అది జాతీయ పార్టీ అని పేర్కొన్నారు. తమ పార్టీ ఎమ్మెల్యేలు మహారాష్ట్రలో ఇద్దరు ఉన్నారని, అదే రాష్ట్రం నుంచి ఓ ఎంపీ కూడా ఉన్నారని గుర్తు చేశారు. బీహార్‌ అసెంబ్లీలోనూ తమ పార్టీకి ప్రాతినిధ్యం ఉందన్నారు.

గత మునిసిపల్ ఎన్నికల్లో భైంసా మునిసిపల్ చైర్మన్‌, వైస్‌ చైర్మన్‌ పదవులను చేపట్టినట్టు అసదుద్దీన్ వివరించారు. వికారాబాద్‌, నిజామాబాద్‌, కోరుట్లలో వైస్‌ చైర్మన్‌ పదవులకు మజ్లిస్‌ ఎన్నికైందన్నారు. ఈసారి వాటితో పాటు మరిన్ని వార్డులు, డివిజన్లలో విజయం సాధిస్తామని ఒవైసీ ధీమా వ్యక్తం చేశారు.

టీఆర్ఎస్ పాలనలో రాష్ట్రంలో శాంతిభద్రతల సమస్యలు లేవని, మైనారిటీలు సంతోషంగా ఉన్నారన్న ఆయన.. ఆ పార్టీతో స్నేహపూర్వకంగా ఉంటున్నా, మునిసిపల్ ఎన్నికల్లో ఆ టీఆర్ఎస్‌తో కలిసి పనిచేయాల్సిన అవసరం లేదన్నారు. రాష్ట్రంలో తమ బలం తమకు ఉందన్నారు. ఇక రాష్ట్రంలో కాంగ్రెస్ ఖాళీ అయిందని, బీజేపీకి తెలంగాణలో స్థానం లేదని, కాబట్టి మునిసిపల్ ఎన్నికల్లో టీఆర్ఎస్సే చాలా చోట్ల తమకు ప్రధాన ప్రత్యర్థి అని అసదుద్దీన్ ఒవైసీ పేర్కొన్నారు.
Tags: MIM Asaduddin Owaisi TRS BJP Congress

Dk Shivakumar Congress Karnataka

కేపీసీసీ అధ్యక్షుడిగా డీకే శివకుమార్ పేరు ఖరారు..

కర్ణాటక కాంగ్రెస్‌లో ముసలం మొదలైంది. డీకే శివకుమార్‌కు కేపీసీసీ అధ్యక్ష బాధ్యతలు దాదాపు ఖాయమని తేలడంతో సిద్ధరామయ్య వర్గంలో అసంతృప్తి మొదలైంది. మరోవైపు, శివకుమార్‌ను పీసీసీ చీఫ్‌గా ఏ క్షణమైనా అధిష్ఠానం ప్రకటించే అవకాశం ఉందని తెలుస్తోంది. గత లోక్‌సభ ఎన్నికల్లో కాంగ్రెస్ ఒకే ఎంపీ స్థానంలో సరిపెట్టుకుంది. దీంతో పీసీసీ చీఫ్ గుండూరావును మార్చి కొత్త అధ్యక్షుడిని నియమించాలని నిర్ణయించారు. అయితే, అప్పటికే సంకీర్ణ ప్రభుత్వం అధికారంలో ఉండడంతో ఆ నిర్ణయాన్ని వాయిదా వేశారు. ఇటీవల జరిగిన ఉప ఎన్నికల్లో కాంగ్రెస్ ఘోర వైఫల్యాన్ని మూటగట్టుకోవడంలో గుండూరావు తన పదవికి రాజీనామా చేశారు. దీంతో నూతన అధ్యక్షుడి ఎన్నిక తప్పనిసరి అయింది.

మూడు రోజుల క్రితం ఢిల్లీ వెళ్లిన సిద్ధరామయ్య..సోనియాను కలిసి అధ్యక్ష పదవికి ఎంబీ పాటిల్ సరైన వ్యక్తని సూచించారు. అయితే, రాహుల్ గాంధీ మాత్రం డీకేవైపే మొగ్గు చూపుతున్నట్టు సమాచారం. మరోవైపు, సంకీర్ణ ప్రభుత్వం కూలడానికి సిద్ధరామయ్య కూడా కారణమని భావిస్తున్న సోనియా.. ఆయన ప్రతిపాదనను పక్కనపెట్టినట్టు తెలుస్తోంది.

రాష్ట్రంలో పార్టీని బలోపేతం చేసేందుకు వ్యూహాలు రచిస్తున్న కాంగ్రెస్ అధిష్ఠానం అందులో భాగంగా శివకుమార్‌కే అధ్యక్ష బాధ్యతలు అప్పజెప్పాలని దాదాపు ఓ నిర్ణయానికి వచ్చినట్టు తెలుస్తోంది. అదే జరిగితే సిద్ధరామయ్యకు పార్టీలో ప్రాధాన్యం తగ్గినట్టే అవుతుందని ఆయన వర్గీయులు అంటున్నారు. పరమేశ్వర్ సహా పలువురు సీనియర్‌లు కూడా సిద్ధరామయ్యను వ్యతిరేకిస్తున్నారు. వారందరూ కూడా డీకేకే మద్దతు తెలిపే అవకాశం ఉంది.
Tags: Dk Shivakumar Congress Karnataka

Trivikram bunny alaavaikuntapuramulo

త్రివిక్రమ్ ఖాతాలో కొత్త ఓవర్సీస్ రికార్డు!

త్రివిక్రమ్ కథలు సిద్ధం చేసుకునే విధానమే కొత్తగా ఉంటుంది. ముందుగా ఒక లైన్ అనుకుని .. అన్ని తరగతుల ప్రేక్షకులను అలరించే అంశాలను మేళవిస్తూ వెళతాడు. వినోదాన్ని పండించే ఏ అవకాశాన్ని వదులుకోకుండా కథను పరుగులు తీయించి, చివరికి ఎమోషన్ కి కనెక్ట్ చేస్తాడు. అందువల్లనే ఆయన సినిమాలు దాదాపు విజయాలను అందుకుంటూ ఉంటాయి. ఇటీవల థియేటర్లకు వచ్చిన ‘అల వైకుంఠపురములో’ సినిమా కూడా అదే విషయాన్ని నిరూపించింది.

త్రివిక్రమ్ కి మరో భారీ విజయాన్ని అందించింది. తెలుగు రాష్ట్రాల్లోనే కాదు ఓవర్సీస్ లోను త్రివిక్రమ్ సినిమాలకి మంచి క్రేజ్ వుంది. ఆయన సినిమాలకి అక్కడ మంచి మార్కెట్ వుంది. తాజా చిత్రమైన ‘అల వైకుంఠపురములో’ సినిమా అక్కడ 2 మిలియన్ మార్క్ వసూళ్లను దాటేసింది. గతంలో త్రివిక్రమ్ చేసిన ‘అజ్ఞాతవాసి’ .. ‘అ ఆ’.. ‘అరవింద సమేత’ సినిమాలు కూడా ఓవర్సీస్ లో 2 మిలియన్ క్లబ్ లో చేరిపోయాయి. వరుసగా నాలుగు సినిమాలతో 2 మిలియన్ మార్క్ ను సాధించిన అరుదైన రికార్డు త్రివిక్రమ్ ఖాతాలోకి చేరిపోవడం విశేషం.
Tags: Trivikram bunny alaavaikuntapuramulo