భాగ్యనగరిలో హైఅలర్ట్‌…మక్కా మసీదులో భారీ బందోబస్తు

పన్నెండేళ్ల క్రితం అనగా 2007 మే 18వ తేదీన హైదరాబాద్‌ నగరాన్ని కుదిపేసిన మక్కామసీదు బాంబు పేలుళ్ల ఘటనను దృష్టిలో పెట్టుకుని పోలీసులు పటిష్ట బందోబస్తు చర్యలు చేపట్టారు. పాతబస్తీలోని మక్కామసీదులోని ఓ పైపులో అమర్చిన బాంబును సెల్‌ఫోన్‌తో పేల్చిన ఈ ఘటనలో 16 మంది అక్కడికక్కడే ప్రాణాలు కోల్పోయారు.

ఆ తర్వాత జరిగిన అల్లర్ల సందర్భంగా పోలీసులు జరిపిన కాల్పుల్లో మరో ఐదుగురు మృతి చెందారు. అప్పట్లో ఈ ఘటన దేశవ్యాప్తంగా సంచలనమయింది. బాగ్యనగరి వాసుల మదిలో నుంచి చెరిగిపోని జ్ఞాపకాల్లో ఈ ఘటన ఒకటి. క్షణాల్లో తీవ్రవిషాదం చుట్టుముట్టేసి కళ్లముందే పలువురు ప్రాణాలు పోగొట్టుకున్నారు. ఈ ఘటన చోటు చేసుకుని ఇన్నేళ్లయినా ఇప్పటికీ పాతబస్తీ వాసుల గుండెల్లో పేలుళ్ల శబ్దాలు మారుమోగుతూనే ఉంటాయి.

దేశంలో ఎక్కడ ఉగ్రవాద చర్యలు చోటు చేసుకున్నా ఆ మూలాలు హైదరాబాద్‌లో ఉంటాయన్న ఆరోపణలు, ఇటీవల చోటు చేసుకున్న పరిణామాల నేపథ్యంలో పేలుళ్ల రోజును దృష్టిలో పెట్టుకుని నగర వ్యాప్తంగా పోలీసులు పటిష్ట బందోబస్తు చర్యలు చేపట్టారు. అనుమానిత ప్రాంతాలు, సమస్యాత్మక ప్రాంతాల్లో మఫ్టీ పోలీసులను మోహరించారు. అనుమానిత వ్యక్తులను నీడలా వెంటాడేందుకు షాడో టీంలను ఏర్పాటు చేశారు.

ఎటువంటి పరిస్థితినైనా తక్షణం ఎదుర్కొనేందుకు వీలుగా క్విక్‌ రియాక్షన్‌ టీం, స్ట్రయికింగ్‌ ఫోర్స్‌ను అందుబాటులో ఉంచారు. ముఖ్య ప్రాంతాల్లో సీసీ కెమెరాలతో నిఘా పర్యవేక్షణ కొనసాగుతోంది. బందోబస్తు ఏర్పాట్లు పర్యవేక్షించేందుకు ఐపీఎస్‌ అధికారులతోపాటు పలువురు సీనియర్‌ అధికారులకు ప్రాంతాల వారీగా బాధ్యతలు అప్పగించారు. ఎటువంటి అవాంఛనీయ సంఘటనలు జరగకుండా అనుక్షణం డేగ కళ్లతో భద్రతా ఏర్పాట్లు పర్యవేక్షిస్తున్నారు.

Leave a Reply

Your email address will not be published. Required fields are marked *